Sló í trérót og þurfti að draga sig úr keppni

Bandaríkjamaðurinn Patrick Reed spilaði vel á fyrsta hring sínum á BMW PGA Championship-mótinu sem byrjaði á fimmtudaginn. Hann var á fjórum undir pari og miðað við spilamennskuna hans átti hann séns á að sækja sigur á mótinu.

Hann byrjaði hringinn í dag ekki vel og fékk þrefaldan skolla strax á fyrstu holunni og ekki batnaði spilamennskan hans eftir það. Hann var níu höggum yfir pari á fyrstu níu holunum en eftir níundu holuna hélt hann um höndina sína og var keyrður í burtu af dómara mótsins.

Samkvæmt miðlinum GolfDigest sló hann í trérót sem var undir boltanum og meiddi sig þannig í hendinni. Sársaukinn hefur verið það mikill að hann gat ekki haldið áfram keppni.

Þetta var ekki í fyrsta skipti á mótinu sem hann spilaði bolta í slæmri legu en á fyrsta hringnum hans endaði boltinn á miðjum vegi. Flestir áhugakylfingar hefðu fært boltann til þess að skemma ekki kylfurnar sínar en Reed ákvað að slá boltann þar sem hann lá.

Hann sló boltann af veginum og þræddi hann í gegnum trén þar og endaði boltinn rétt fyrir framan flötina. Reed sýndi að slá bolta í slæmri legu getur bæði skilað af sér frábærum golfhöggum en verið gríðarlega vont þegar það gengur ekki.

Ekki er víst hversu mikil meiðslin eru eða hversu lengi Reed verður frá keppni.

Mótið er sýnt í beinni útsendingu á Sýn Sport 4 og hefst útsending klukkan 11:00.