Brynjar Már fer yfir til Corus frá Isavia

Er þetta meðal þess sem fram kemur í tilkynningu en þar segir einnig að Brynjar búi yfir víðtækri reynslu úr mannauðsstjórnun, vöruþróun og rekstri. Hann komi yfir til Corus frá Isavia, þar sem hann gegndi starfi mannauðsstjóra síðastliðin fimm ár.

Fengur fyrir félagið

Áður starfaði Brynjar sem mannauðsstjóri hjá RB, sem verkefnastjóri í mannauðsteymi Origo og sem ráðgjafi í vöruþróunarteymi Kjarna, mannauðs- og launakerfis. Þá hafi Brynjar jafnframt verið virkur í fagfélagi mannauðsfólks til fjölda ára og gegnt þar formennsku.

„Það er gríðarlegur fengur fyrir Corus að fá Brynjar í okkar raðir. Hann er einn sterkasti fagaðilinn í mannauðsheiminum á Íslandi í dag og nýtur trausts og virðingar langt út fyrir okkar raðir,“ er haft eftir Dröfn Guðmundsdóttur, framkvæmdastjóra Corus.

„Brynjar þekkir lausnir okkar og notendaupplifunina í kringum þær betur en flestir og reynsla hans mun nýtast okkur beint í að þróa Kjarna og Moodup enn frekar í takt við þarfir viðskiptavina. Ég hlakka til að fylgja Brynjari og teyminu inn í næsta vaxtarskeið Corus.“

Tækifæri til að sameina tvennt

Í tilkynningunni segir að ráðning Brynjars sé liður í áframhaldandi uppbyggingu Corus, þar sem félagið leggi aukna áherslu á að tengja saman ráðgjöf, sölu og vöruþróun til að tryggja samræmda upplifun viðskiptavina.

Eftir Brynjari sjálfum er haft að hann hafi mikla ástríðu fyrir mannauðsmálum – en líka fyrir tækni og þeim tækifærum sem hún skapar.

„Tæknin gefur okkur í dag tækifæri til að endurhugsa hvernig við vinnum, hvernig við leiðum fólk og hvernig fyrirtæki ná árangri. Hjá Corus fæ ég tækifæri til að sameina þetta tvennt, mannauðsmál og tækni,“ er haft eftir honum og áfram „hjá félaginu starfar einvala lið sérfræðinga sem þróar og þjónustar lausnir sem ég hef sjálfur nýtt með frábærum árangri sem mannauðsstjóri. Það er því mikil tilhlökkun að taka næsta skref með starfsfólki Corus.“