Nú á að okra á miðum á Ólympíu­leikana

Næstu Ólympíuleikar fara einnig fram í Bandaríkjunum, nánar tiltekið í Los Angeles í Kaliforníu. Það er ljóst að hátt miðaverð mun einnig setja svip sinn á þá leiki eins og á HM í sumar.

Flestir miðar á Ólympíuleikana í Los Angeles 2028 kosta mörg hundruð dollara en þetta staðfestir The Athletic. Eftirsóttustu sætin á tugum vinsælla viðburða kosta meira en þúsund dollara eða meira en 123 þúsund íslenskra króna.

Verðin eru, þegar á heildina er litið, þau langhæstu í sögu Ólympíuleikanna. Í mörgum tilfellum eru miðar á LA28 meira en tvöfalt dýrari en sambærilegir miðar á Ólympíuleikana í París 2024.

Dýrasti miðinn á setningarhátíðina á Ólympíuleikunum í Los Angeles er nú 5519 dollarar eða meira en 680 þúsund íslenskar krónur.

Það er einnig rándýrt að fara á lokahátíðina en dýrasti miðinn á keppni er á leiki í körfubolta karla en þar gæti miði á leik kostað 3350 dollara eða um 414 þúsund íslenskar krónur.