Tryggði bæði fram­lengingu og skoraði sigurkörfuna

Chelsea Gray tryggði Las Vegas Aces 86-84 sigur á Indiana Fever í uppgjöri tveggja heitustu liðanna í WNBA-deildinni í körfubolta.

Gray gerði reyndar gott betur en það. Hún byrjaði á að tryggja Las Vegas framlengingu með þriggja stiga flautukörfu og skoraði síðan sigurkörfuna á flautunni í framlengingunni en hefði hún klikkað á báðum þessum skotum hefði lið hennar tapað leiknum.

Þetta var þó ekki leikurinn hennar Caitlin Clark sem klikkaði á tveimur vítaskotum sjö sekúndum fyrir lok venjulegs leiktíma og tapaði boltanum síðan rétt fyrir lok framlengingarinnar.

Gray skoraði reyndar bara 11 stig og þrjá þrista í öllum leiknum en kom sér engu að síður í sögubækurnar. Hún er fyrsti leikmaðurinn í sögu WNBA til að jafna leikinn með flautukörfu í lok venjulegs leiktíma og tryggja sigurinn með flautukörfu í lok framlengingar í sama leik.

Gray þakkaði liðsfélögum sínum Jackie Young (22 stig) og A'ju Wilson (26 stig og 13 fráköst) fyrir að koma henni í góða stöðu fyrir flautukörfurnar.

„Við vorum með leikkerfi en það var ekki fyrir mig. Það var ekki teiknað upp þannig. Aliyah Boston sló boltann frá – þetta var sending til mín og þetta átti að vera öðruvísi skot,“ sagði Gray um lok venjulegs leiktíma. „En Jackie, hún hélt áfram að spila, sendi boltann aftur á mig og ég leit upp á klukkuna, átti bara eina sekúndu eftir, eitt dripl og skot, og ég setti hann niður,“ sagði Gray.

„Og svo í framlengingunni, ja, fyrst og fremst var A'ja með frábæra vörn. Við segjum alltaf að þetta muni snúast um vörnina okkar. Og hún var með frábæra vörn, kom boltanum til mín í hraðaupphlaupinu. Ég vissi að [þjálfarinn Becky Hammon] ætlaði ekki að taka leikhlé. Þannig að ég sendi boltann á Jackie og hún hefði getað skorað. En hún leitaði að mér við þriggja stiga línuna. Ég leit aftur upp á klukkuna, setti hann niður. Vú! Ótrúlegt,“ sagði Gray en það má sjá þessar körfur með því að smella hér fyrir ofan.