Elín Helga yfir­gefur Hvíta húsið

Í fréttatilkynningu þess efnis segir að á þessum tíma hafi Elín Helga leitt Hvíta húsið af metnaði og fagmennsku. Undir hennar forystu hafi félagið styrkt stöðu sína á markaði, byggt upp öfluga vinnumenningu og mætt hröðum breytingum sem hafi átt sér stað í auglýsingageiranum af framsýni og áræðni.

Dröfn Þórisdóttir taki við sem staðgengill framkvæmdastjóra á meðan unnið sé að ráðningu nýs framkvæmdastjóra. Hvíta húsið standi á traustum grunni og haldi áfram að þróa þjónustu sína, skapa viðskiptavinum verðmæti og byggja á þeirri sterku þekkingu og reynslu sem býr innan fyrirtækisins.

„Elín hefur átt stóran þátt í uppbyggingu og þróun Hvíta hússins á þeim 22 árum sem hún hefur starfað hjá félaginu, og sett djúp og varanleg spor í sögu þess. Undir hennar forystu hefur félagið eflst, byggt upp sterka menningu og mætt breytingum á markaðnum af festu og framsýni. Við kveðjum hana með einlægu þakklæti og virðingu og óskum henni velfarnaðar á nýjum vettvangi,“ er haft eftir Önnu Kristínu Kristjánsdóttur, stjórnarformanni Hvíta hússins.

„Ég lít til baka með stolti yfir því sem við höfum byggt upp saman og þeirri menningu sem hefur einkennt fyrirtækið. Þegar upp er staðið eru það tengslin og fólkið sem skipta mestu máli. Ég kveð með þakklæti og hlakka til að fylgjast með Hvíta húsinu halda áfram að þróast og dafna um ókomin ár,“ er haft eftir Elínu Helgu.