Dómarar viður­kenna mis­tök í síðasta kapp­akstri

Dómarar Formúlu 1 funduðu fyrir ungverska kappaksturinn um helgina og fóru yfir nokkur atvik sem gerðust í belgíska kappakstrinum um síðustu helgi. Þar komust dómarar að þeirri niðurstöðu að Charles Leclerc hefði átt að fá refsingu þegar Oscar Piastri var að reyna að taka fram úr honum.

Þegar báðir ökumenn voru búnir að bremsa þvingaði Leclerc mótherja sinn víðar þar sem ekki var pláss fyrir Piastri til að hörfa. Það stendur skýrt í reglum Alþjóða ökumannasambandsins að það er bannað að færa bílinn á meðan verið er að bremsa vegna þess hve hættulegt það er.

Við samstuðið skemmdist gólf Mclaren-bifreiðar Oscar Piastri og endaði hann keppnina í fimmta sæti. Leclerc endaði keppnina í öðru sæti en þegar atvikið gerðist fannst dómurum báðir ökumenn vera jafn sekir.

Annað umdeilanlegt atvik gerðist á fyrsta hring kappakstursins þegar Mercedes-ökumaðurinn George Russell lenti í samstuði við Lewis Hamilton, ökumann Ferrari. Samstuðið var á fyrsta hring og því mikið um bíla nálægt hvor öðrum. Russell endaði á að þurfa að hætta keppni eftir samstuðið og fékk Hamilton fimm sekúndna refsingu.

Ekki var gerð athugasemd við þá refsingu af dómurum en Lewis Hamilton var einn af fimm ökumönnum sem mættu ekki á dómarafundinn.