Tvær stöndugar fast­eignasölur sam­einast

Í tilkynningu segir að með sameiningunni verði til ein öflugasta fasteignasala landsins en hún verður skipuð rúmlega tuttugu starfsmönnum, allt löggiltum fasteignasölum með víðtæka reynslu af íslenskum fasteignamarkaði.

Heimili fasteignasala var stofnuð árið 2002 og er því 24 ára í dag. Landmark fasteignamiðlun var stofnuð árið 2010 og er 16 ára. Í tilkynningu segir að bæði fyrirtækin hafi á sínum starfsvettvangi byggt upp sterkt orðspor fyrir fagmennsku og árangur á íslenskum fasteignamarkaði.

Eigendur hins nýja félags eru níu löggiltir fasteignasalar sem hafa um langt árabil starfað við fasteignamiðlun. Með sameiginlegri sýn leggja þeir áherslu á fagmennsku, persónulega þjónustu og öfluga ráðgjöf fyrir einstaklinga, fjölskyldur og fyrirtæki á öllum stigum fasteignaviðskipta.

„Með þessari sameiningu verður til öflugur vettvangur fyrir bæði starfsfólk og viðskiptavini. Við sameinum reynslu, sérþekkingu og sterkan mannauð tveggja farsælla fyrirtækja og getum þannig boðið enn öflugri þjónustu á öllum sviðum fasteignaviðskipta. Markmið okkar er að byggja upp leiðandi fasteignasölu sem sameinar fagmennsku, traust og nýsköpun,“ er haft eftir Finnboga Hilmarssyni sem verður framkvæmdastjóri hinnar nýju fasteignasölu.

Þá er vitnað í Moniku Hjálmtýsdóttur, sem er stjórnarformaður hinnar nýju fasteignasölu, sem segir sameininguna litast af sameiginlegri sýn eigendanna á framtíð fyrirtækisins.

„Við höfum um nokkurt skeið séð tækifæri til að sameina styrkleika Heimilis og Landmark undir einu þaki. Með því skapast öflugra fyrirtæki sem býr yfir breiðari þekkingu, sterkari innviðum og enn meiri getu til að mæta síbreytilegum þörfum viðskiptavina. Við teljum að þetta sé farsælt skref fyrir fyrirtækið, starfsfólkið okkar og viðskiptavini til framtíðar.“

Undirbúningur að starfsemi félagsins stendur nú yfir og verður nýtt nafn og vörumerki kynnt síðar í sumar. Meðan á undirbúningi stendur munu Heimili og Landmark halda áfram starfsemi sinni með óbreyttum hætti og áður.

Í tilkynningu segir jafnframt að sameiningin endurspegli þá þróun sem orðið hefur á fasteignamarkaði á síðustu árum, þar sem auknar kröfur um sérfræðiþekkingu, stafrænar lausnir og öfluga ráðgjöf kalla á sterkari og fjölbreyttari rekstrareiningar.