Kaupa allt hluta­fé í Nicetravel

Í tilkynningu segir að Nicetravel sé eitt af leiðandi fyrirtækjum landsins á sviði skipulagðra hópferða fyrir erlenda ferðamenn.

„Stærstu hluthafar verða Engilbert og Andri Gunnarsson, sem jafnframt verður stjórnarformaður félagsins. Meðal annarra fjárfesta eru Gestur Breiðfjörð Gestsson, Davíð Másson, Skúli Mogensen, bræðurnir Sveinn og Henrik Biering ásamt bræðrunum Birgi og Bjarna Brynjólfssonum.

Fráfarandi eigendur, Stefán Þór Gunnarsson og Tryggvi Þór Ágústsson, munu starfa með nýjum eigendum á næstu mánuðum til að tryggja hnökralaus eigendaskipti og farsæla yfirfærslu rekstrarins.

Nicetravel var stofnað árið 2012 með kaupum á einni rútu en hefur frá árinu 2016 starfað í núverandi mynd og vaxið hratt á undanförnum árum. Í dag rekur það 23 nýlegar 19 manna Mercedes-Benz rútur og býður upp á fjölbreytt úrval dagsferða og lengri hringferða um allt Ísland. Fyrirtækið sérhæfir sig í ferðalögum fyrir litla hópa þar sem lögð er áhersla á persónulega þjónustu, gæði, öryggi og einstaka upplifun af íslenskri náttúru. Umsagnir viðskiptavina hafa verið afar jákvæðar en Nice Travel er með 4,9 af 5 mögulegum í meðaleinkunn á Tripadvisor, sem telst með því besta sem gerist í íslenskri ferðaþjónustu,“ segir í tilkynningunni.

Veltir tveimur milljörðum

Félagið veltir í dag yfir tveimur milljörðum króna á ári og segir í tilkynningunni að það sé með góða rekstrarafkomu. Reksturinn byggi á öflugum mannauði og flotastýringu, háu hlutfalli eigin sölu og skýru viðskiptamódeli sem hefur skapað traustan grunn fyrir áframhaldandi vöxt.

„Ég er afar spenntur að taka við rekstri Nicetravel og snúa aftur til ferðaþjónustunnar. Fyrirtækið er traust, vel rekið og byggir á afar sterkum grunni sem fyrri eigendur hafa skapað. Það býr yfir öflugum mannauði, framúrskarandi þjónustu og einstöku orðspori meðal erlendra ferðamanna. Við sjáum fjölmörg tækifæri til áframhaldandi vaxtar og ætlum að byggja ofan á þann árangur sem þegar hefur náðst,“ er haft eftir Engilbert, nýjum framkvæmdastjóra Nicetravel.

Um Engilbert segir að hann hafi víðtæka reynslu af rekstri fyrirtækja með sérstaka áherslu á sölu- og markaðsmál. 

„Hann var framkvæmdastjóri sölu- og markaðssviðs hjá WOW air á árunum 2013–2018 og framkvæmdastjóri sölu-, markaðs- og stafrænnar þróunar hjá Reykjavík Excursions á árunum 2018–2020. Hann sat jafnframt í Ferðaskrifstofunefnd SAF á árunum 2019–2020. Undanfarin ár hefur hann sinnt fjárfestingum og ráðgjöf fyrir fjölbreytt fyrirtæki og setið í stjórnum meðal annars Norðanfisks og Endor, auk þess að hafa verið stjórnarformaður Eðalfangs. Engilbert er með Executive MBA gráðu frá Háskóla Íslands.“

Ennfremur segir að ráðgjafar seljenda við söluna hafi verið fyrirtækjaráðgjöf Landsbankans og Magna Lögmenn. Þá hafi ráðgjafar kaupenda verið fyrirtækjaráðgjöf Arion banka og Nordik lögfræðiþjónusta.