ESB gæti markað enda­lok um­deildra skil­mála Icelandair

Síðastnefndi hópurinn mun sömuleiðis eiga rétt á bótum, endurbókun og aðstoð ef farþegar missa af flugi vegna þess að flugfélagi tekst ekki að koma þeim að brottfararhliði í tæka tíð. 

Þá er lagt til að flugrekendum verði gert óheimilt að banna fólki að fara um borð á grundvelli þess að farþegi nýtti ekki fyrri fluglegg í sömu bókun. Töluvert hefur verið fjallað um umdeilda skilmála Icelandair sem hafa leitt til þess að bókun er felld niður ef farþegi mætir ekki í fyrra flug. 

Ásdís Ýr Pétursdóttir, forstöðumaður samskipta hjá Icelandair, staðfestir að mætingarskyldan eða svokölluð „no-show“-regla sé enn við lýði hjá félaginu en taldi annars of snemmt að tjá sig um vendingarnar í Brussel á þessu stigi.

Þau svör fengust frá Icelandair fyrr á þessu ári að þetta fyrirkomulag væri þekkt meðal alþjóðlegra flugfélaga og hjálpaði til við að tryggja að sæti nýttust öðrum farþegum. Í sumum tilfellum væri hægt að vernda bókunina ef farþegar láti vita tímanlega að þeir muni ekki nýta fyrsta fluglegg. 

Eiga að sýna fargjald með handfarangri fyrst

Ef uppfærðu reglurnar um réttindi flugfarþega ná fram að ganga verður flugfélögum, bókunarsíðum og leitarvélum gert skylt að birta fyrst fargjald sem inniheldur handfarangurstösku til að auðvelda jafnan samanburð milli flugfélaga. Einnig er lagt til að flugfélögum verði bannað að rukka farþega fyrir að leiðrétta innsláttarvillur í nafni sínu.

Áður en breytingarnar taka gildi þarf Evrópuþingið og ráðherraráð Evrópusambandsins að staðfesta bráðabirgðasamkomulagið á næstu sex til átta vikum. Evrópuþingið áformar svo að greiða atkvæði um samkomulagið á þingfundi í júlí. Talið er að breytingarnar gætu tekið gildi á næsta ári og myndu þær einnig hafa áhrif á rétt íslenskra flugfarþega.

Reglurnar höfðu ekki verið uppfærðar frá árinu 2004 og ekki náðst samstaða um að breyta þeim í yfir áratug. Fjallað er um samkomulagið á vef Evrópuþingsins og vef ráðherraráðsins.

Þurfa ekki að greiða bætur ef flugi er aflýst vegna verkfalls

Samkvæmt tillögunum verður flugfélögum skylt að leyfa farþegum að taka með sér persónulegan hlut á borð við handtösku eða bakpoka án aukagjalds og eiga þeir áfram rétt á greiðslu ef lendingartíma seinkar um minnst þrjár klukkustundir eða ferð er aflýst innan við fjórtán dögum fyrir brottför. Þetta mætti andstöðu leiðtoga sumra Evrópuþjóða sem vildu að reglum yrði breytt í þágu flugfélaga.

Á sama tíma myndu nýju reglurnar heimila flugrekendum að sleppa því að borga bætur ef seinkun eða aflýsing kemur til vegna óviðráðanlegra aðstæðna. Náttúruhamfarir, stríðsátök, óveður, óstýrilátir farþegar og verkfall sem hefur áhrif á starfsemi flugvalla, flugumferðarstjórnunar eða flugafgreiðslu er meðal þess sem er sérstaklega tilgreint.

Athygli vekur að lagt er til að bótaupphæð verði áfram sú sama og ákveðið var árið 2004 eða 250 til 600 evrur, sem samsvarar um 36 til 86 þúsund krónum. Tekur upphæðin áfram mið af fluglengd í kílómetrum en heimilt er að lækka hana ef seinkun var ekki lengri en fjórir tímar.