Sigraði sitt fjórða PGA-mót þrátt fyrir ó­veður

Poston átti flott mót og var með fjögurra högga forskot fyrir síðasta hring mótsins. Raska þurfti þó mótinu vegna óveðurs og voru einhverjir kylfingar sem þurftu að klára þriðja hringinn á sunnudagsmorgni.

Poston var á tólf höggum undir pari eftir alla fjóra hringina ásamt Bandaríkjamanninum Ryan Gerard og því ljóst að þeir þurftu að fara í umspil til að fá sigurvegara mótsins.

Á fyrstu holu í umspili áttu báðir kylfingar tækifæri á að fá fugl en hvorugur hitti úr sínum púttum. Á annarri holu fékk Poston aftur tækifæri á fugli sem Gerard fékk ekki. Poston greip það tækifæri og náði því að vinna mótið.

Englendingurinn Tommy Fleetwood var nálægt því að sigra mótið en hann var kominn í fyrsta sæti þegar hann var búinn með fimmtán holur á lokahringnum. Hann fékk hins vegar skolla á sautjándu holu og endaði því tveimur höggum frá Poston og Gerard.

Rory Mclroy endaði mótið á fjórum höggum undir pari ásamt Justin Rose og Scottie Scheffler.