Vilja banna lands­liðsþjálfurum að þjálfa fé­lags­lið

Ályktun þess efnis, sem í upphafi var lagabreytingatillaga af hálfu ÍBV, var samþykkt á ársþingi HSÍ á föstudaginn.

Lagt hafði verið til að við 24. gr. laga HSÍ bættist ný málsgrein: „Þjálfarar sem starfa með A-landsliðum og U21-landsliðum Íslands skulu ekki á sama tíma vera starfandi þjálfarar eða hluti af þjálfarateymi íslenskra félagsliða."

Málið er nú í höndum stjórnar HSÍ en ljóst er að henni er vandi á höndum því algengt er að þjálfarar íslenskra landsliða starfi einnig hjá íslensku félagsliði.

Til að mynda hefur Snorri Steinn Guðjónsson, þjálfari A-landsliðs karla, starfað við þjálfun í 3. flokki og hjá venslaliði Vals, og Arnar Pétursson þjálfari A-landsliðs kvenna var í þjálfarateymi kvennaliðs Fram. 

Ljóst er að óánægju hefur gætt með það að landsliðsþjálfari sé að störfum hjá félagsliði í ljósi þeirra áhrifa sem það gæti mögulega til að mynda haft á val leikmanna í landslið sem og val leikmanna um hvaða félagslið þeir kjósa að spila fyrir.

Á vef Handkastsins hefur verið tekið saman að af þjálfurum í A-landsliðum og U20-liðum karla og kvenna séu að minnsta kosti sjö þjálfarar sem einnig starfi fyrir íslensk félagslið.

Eins og fyrr segir er aðeins um ályktun að ræða sem stjórn HSÍ þarf nú að ákveða hvernig verður unnið út frá.