Skíðin komin í skúrinn

Kristrún meiddist alvarlega fyrir nokkrum vikum og þau meiðsli hafa leitt til þess að ekki er raunhæft að hún geti haldið áfram á keppnisstigi.

Kristrún á að baki glæstan landsliðsferil á gönguskíðunum en hún keppti meðal annars á tvennum Ólympíuleikum. Í Peking árið 2022 og nú síðast í Mílanó fyrr á árinu.

Einnig hefur hún tekið þátt á þremur heimsmeistaramótum og 164 alþjóðlegum FIS-keppnum.

Hún varð fjórtán sinnum Íslandsmeistari í einstaklingsgreinum og vann jafnframt til sjö silfurverðlauna og tveggja bronsverðlauna á Skíðamóti Íslands.

Besta árangri sínum á alþjóðavettvangi náði hún í desember 2023 þegar hún hafnaði í 14. sæti í Scandinavian Cup í Vuokatti í Finnlandi. Þar að auki á Kristrún besta tíma allra íslenskra kvenna frá upphafi í Vasaloppet (Vasagöngunni), einni virtustu skíðagöngu heims.