Prent­smiðjan Ísa­fold gjald­þrota: „Þetta er bara von­laus business"

„Þetta er bara vonlaus business,“ segir Kjartan Kjartansson, framkvæmdastjóri prentsmiðjunnar Ísafoldar, í samtali við Vísi um þessi tímamót.

Hann hefur verið eigandi Ísafoldar frá árinu 2002 en hann byrjaði í prentbransanum árið 1979. Mestur var atgangurinn í faginu á blómatímabili Fréttablaðsins sáluga á fyrsta áratug þessarar aldar, en útgáfufélag blaðsins, Torg, var tekið til gjaldþrotaskipta árið 2023.

„Prentbransinn er bara vonlaus business og allir að ströggla, ekki bara á Íslandi heldur út um allan heim. Svo í ofanálag er launakostnaður hár á Íslandi og miklu ódýrara að prenta erlendis. Við prentuðum allar kiljur hér áður fyrr en nú er þetta allt farið í prentun erlendis,“ segir Kjartan.

Hann segir að það hafi vissulega verið erfitt að kveðja samstarfsfólkið sitt hjá Ísafold með þessum hætti. Hingað til hafi fólk ekki hætt nema það væri komið á aldur.

„Og ég sjálfur löngu kominn á aldur. Orðinn 71 árs.“

Og sökum þess sé hann ekkert að stressa sig á því hvað taki við hjá sér næst.

„Ég horfi bara björtum augum til sumarsins enda með fjölda áhugamála sem þarf að sinna,“ segir Kjartan.