Fór aftur holu í höggi á Masters og fær kristalsskál

Sindri Sverrisson skrifar 11. apríl 2026 22:39

Shane Lowry sýndi mögnuð tilþrif á Masters í dag og er í toppbaráttunni fyrir lokahringinn. Getty/Hector Vivas

Írinn Shane Lowry varð í dag fyrsti kylfingurinn til þess að ná tvisvar sinnum að fara holu í höggi á Masters-mótinu í golfi. Draumahöggið má sjá á Vísi.

Lowry náði högginu í dag á 6. braut sem er par 3 og gerði það með sannfærandi hætti, eins og sjá má hér að neðan.

Klippa: Lowry fór holu í höggi

Írinn notaði 7-járn í teighöggið sitt og sló boltanum þá 174 metra sem þurfti til að koma honum í holuna. Hann fagnaði svo vel með félaga sínum Tommy Fleetwood.

Áður hafði Lowry náð að fara holu í höggi á Masters árið 2016 en þá á 16. holu. Launin fyrir að fara holu í höggi á Masters eru sérstök kristalsskál.

Það sem gerir afrek Írans enn merkilegra er svo einnig að hann náði líka að fara holu í höggi á síðasta móti sem hann spilaði á, eða Houston Open.

Lowry er aðeins þriðji kylfingurinn sem nær að fara holu í höggi oftar en einu sinni á risamóti, á síðustu tuttugu árum, en hinir eru Si Woo Kim og Louis Oosthuizen.

Lowry er sem stendur á meðal efstu manna, á -9 höggum, eftir að hafa spilað á -4 höggum á þriðja hringnum í dag. Hann er því svo sannarlega með í baráttunni um sigurinn á Masters en er þremur höggum á eftir Rory McIlroy.

Golf Masters-mótið