„Of stórt tæki­færi til að hoppa ekki á það“

„Ég er stoltur, spenntur. Mér finnst ég vera á toppnum á mínum ferli til þessa bæði líkamlega og andlega. Finnst það ákveðin viðurkenning að vera sóttur þangað,“ segir Janus Daði í samtali við íþróttadeild Sýnar en nánar verður rætt við hann í Sportpakkanum að loknum kvöldfréttum Sýnar í kvöld. 

Aðdragandinn að skiptunum hefur verið langur en Janus gengur í raðir Börsunga frá Pick Szeged í Ungverjalandi. 

„Fyrst heyrir maður eitthvað og hugsar maður með sér: „Vá Barcelona, geðveikt.“ Ef það er möguleiki þá skoðar maður hann. Eftir að hafa velt þessu fyrir mér fram og til baka finnst mér þetta of stórt tækifæri til að hoppa ekki á það. Ég held þetta sér stærsta félag í heimi. Að fara í sólina skemmir ekki fyrir. Við erum bara spennt að færa okkur suður eftir. Prófa að vera partur af svona apparati.“

Gott fyrir Barcelona og landsliðið

Heiðurinn að verða leikmaður Barcelona sé mikill en þar ætlar Janus Daði ekki að vera varaskeifa heldur einn af burðarstólpum liðsins.

„Bendir á að maður er að gera eitthvað rétt. Fólk virðist kunna að meta það sem maður stendur fyrir. Á sama tíma gefur það manni aukakraft að halda áfram. Þig langar í meira. Það spilar saman með því sem hefur verið að gerast í landsliðinu. Við finnum það þar að við erum að nálgast eitthvað stórt. Ég held þetta passi bara vel fyrir bæði.“

Íslendingunum fjölgar í liðinu. Viktor Gísli Hallgrímsson er fyrir á mála hjá félaginu en Janus Daði ræddi mikið við hann í aðdraganda skiptanna sem og Aron Pálmarsson, fyrrverandi leikmann liðsins.

„Ég þekki náttúrulega Aron Pálmars líka rosalega vel. Hann var lengi á mála hjá félaginu á sínum tíma. Gott að fá punkta frá þeim hvernig þetta sé, hvort þetta sé ekki alveg örugglega málið. Þeir drógu ekkert úr því að þetta væri frábær staður.“

Nánar verður rætt við Janus Daða í Sportpakkanum á Sýn að loknum kvöldfréttum í kvöld.