Lík­legra en áður að nýjar í­búðir seljist undir á­settu verði

„Það er að hægjast á taktinum og það er kannski í samræmi við síðustu mánuði að verðþrýstingurinn hefur minnkað á íbúðamarkaði. Svo er áhugavert sem við sjáum í verðþróun á nýjum íbúðum að undirboð er að færast í aukana þar og það er líklegra að nýjar íbúðir séu að seljast undir ásettu verði en áður,“ segir Jónas Atli Gunnarsson, hagfræðingur HMS.

Umtalsverð ný lántaka í byggingariðnaði

Þá sýni staðan í byggingariðnaði einnig merki um stöðnun, eða hægfara kólnun. „Sem betur fer sjáum við ekki mikið hrun á byggingarmarkaði. Frekar myndi þetta vera stöðnun eða hægfara kólnun. Starfsfólki hefur ennþá fjölgað þótt að fjölgunin sé mjög lítil. Það yrði vissulega áhyggjuefni ef að kólnunin væri mikil á byggingarmarkaðnum ef að byggingaraðilar næðu ekki að selja nýjar íbúðir. En okkur sýnist þetta vera frekar merki um aðlögun á byggingarmarkaði að nýjar íbúðir seljist þá á lægra verði þannig að þá minnkar þessi lager af óseldum nýjum íbúðum þannig að ný byggingarverkefni geti haldið áfram og fara af stað,“ segir Jónas.

Athygli vekur einnig að ný lántaka í byggingargeiranum hefur aukist um 70% á milli ára á sama tíma og hún hefur dregist saman í öðrum atvinnugreinum. „Skuldsetning er oft tákn um mikil umsvif eða mikla fjárfestingu. En við sjáum líka að það er sterk fylgni á milli þess þegar skuldsetning eykst hjá byggingarfyrirtækjum og nýjum og óseldum íbúðum fjölgar. Og það er kannski eðlilegt þar sem að flestir byggingaraðilar eru að fjármagna sig með lánum sem þeir geta bara borgað upp þegar þeir selja nýjar íbúðir. En skuldsetningin hefur aukist mjög hratt núna á síðustu mánuðum eftir því sem að óseldum nýjum íbúðum hefur fjölgað.“

Leiguverðshækkanir minni en verðbólga í fyrsta sinn í nokkur ár

Þá hefur dregið úr verðþrýstingi á leigumarkaði og sömuleiðis hefur þeim farið fjölgandi á milli ára sem eiga rétt á húsnæðisbótum.

„Við sjáum í fyrsta skipti að leiga er að hækka minna heldur en verðbólgan á síðustu tólf mánuðum og það er í fyrsta skipti sem það gerist í nokkur ár eftir að það hefur verið mikill þrýstingur þar. En ennþá er hlutfall leigu af fasteignaverði frekar lágt, þannig það mætti búast við því að leiguverð hækki hraðar heldur en fasteignaverð á næstu árum ef taka á mið af sögulegri þróun,“ segir Jónas.

Nánar má skoða nýja mánaðarskýrslu HMS hér.