Erla Ósk nýr for­maður Jafn­vægis­vogarráðs

„Jafnvægisvog FKA var sett á laggirnar árið 2018 með það skýra markmið að stuðla að auknu jafnvægi kynja í efsta lagi stjórnunar í íslensku atvinnulífi. Verkefnið var frá upphafi hugsað sem hreyfiafl – ekki lagaskylda heldur hvati – byggt á þeirri einföldu staðreynd að jafnrétti gerist ekki af sjálfu sér,“ segir í fréttatilkynningu þess efnis frá FKA.

Þar segir að í samstarfi við Creditinfo, Deloitte, dómsmálaráðuneytið, Háskóli Íslands, Pipar\TBWA, Ríkisútvarpið, Samtök fyrirtækja í sjávarútvegi og Sjóvá hafi verkefnið þróast í eitt sýnilegasta og áhrifamesta jafnréttisátak á sviði stjórnunar hér á landi.

Þrátt fyrir framfarir séu karlar enn um 75 prósent nýráðninga í æðstu stjórnunarstöður. Með óbreyttri þróun náist 40/60 jafnvægi í framkvæmdastjórnum í fyrsta lagi árið 2065 samkvæmt spálíkani, sem Ásta Dís Óladóttir hafi sett fram árið 2025. 

„Jafnrétti gerist ekki af sjálfu sér. Það þarf mælingar, gagnsæi og meðvitaða ákvörðun um að gera hlutina öðruvísi. Jafnvægisvogin er til þess að flýta þessari þróun og gera hana sýnilega,“ er haft eftir Erlu Ósk.