Kvika skráði ekki tugi þúsunda við­skipta og fær tug­milljóna sekt

Í sáttinni, sem lesa má í heild sinni hér, segir að með bréfi dagsettu 7. febrúar 2025 hafi Kvika banki hf. lýst yfir vilja til að ljúka málinu með sátt við fjármálaeftirlitið. Á fundi fjármálaeftirlitsnefndar hinn 30. október 2025 hafi málið verið talið að fullu upplýst og forsendur til að ljúka því með sátt og greiðslu sektar að fjárhæð 20.000.000 kr. til ríkissjóðs.

Mikilvæg gagnaskil

Við ákvörðun sektarfjárhæðar hafi fjármálaeftirlitið horft til alvarleika brots Kviku og tilgangs tilkynningaskyldu MiFIR, en ákvæðið endurspegli mikilvægi TRS II gagnaskila fyrir fjármálaeftirlitið, meðal annars til að greina innherjasvik og markaðsmisnotkun og efla þannig traust og trúverðugleika á verðbréfamarkaði. 

Við mat á sektarfjárhæð hafi verið horft til þess að um hafi verið að ræða alvarlegt brot gegn ákvæði MiFIR, sem snúi að miklu magni eftirlitsgagna, eða 73.792 viðskiptum, sem ekki hafi verið skilað til fjármálaeftirlitsins yfir langan tíma, eða tæpa 14 mánuði á tímabilinu 14. desember 2022 til 7. febrúar 2024. 

Við ákvörðunina hafi einnig verið tekið mið af sjónarmiðum um varnaðaráhrif, skilvirkni og meðalhóf. 

Dráttur á meðferð

Til lækkunar á sektarfjárhæð Kviku hafi verið litið til þess að meðferð málsins hjá fjármálaeftirlitinu hafi dregist af ástæðum sem ekki verði raktar til Kviku og samstarfsvilji bankans, sem hafi meðal annars falist í því að hafi gripið til úrbóta. 

Til hækkunar á sektarfjárhæð hafi verið litið til þess að Kvika gerði sátt við fjármálaeftirlitið árið 2021 vegna brota gegn þágildandi lögum um verðbréfaviðskipti.