Icelandair tapaði 1,2 milljörðum árið 2025

Einnig hafi verið slegið met í sætanýtingu um borð í vélum Icelandair og farþegafjöldi farið í fyrsta sinn yfir fimm milljónir. Forstjóri segir rekstrarniðurstöðu 2025 ekki vera í takti við áætlanir í byrjun árs. Félagið sé á réttri leið en breytingar á rekstrarumhverfi hafi haft verulega neikvæð áhrif á afkomu Icelandair í fyrra. Þetta kemur fram í tilkynningu til Kauphallar.

EBIT tap ársins nam 2,2 milljörðum króna og jókst um 289 milljónir króna frá árinu 2024. Á sama tíma lækkaði EBIT tap um 252 milljónir króna á fjórða ársfjórðungi 2024 samanborið við sama tímabil árið áður.

Staða alþjóðamála haft áhrif

„Umrót í alþjóðamálum leiddi til veikingar bandaríkjadals sem hafði bein áhrif á afkomuna og á eftirspurn til Íslands frá Norður-Ameríku, okkar stærsta markaði, sem og neikvæð áhrif á tekjumyndun á Atlantshafsmarkaðnum,“ segir Bogi Nils Bogason forstjóri Icelandair í tilkynningu.

„Þá hafa launahækkanir á íslenskum vinnumarkaði verið langt umfram þá þróun sem við sjáum í nágrannalöndum okkar sem er mikil áskorun fyrir þjónustumiðaðar útflutningsgreinar sem eru að mestu með tekjur í erlendri mynt. Þar til viðbótar hafa umhverfisgjöld tvöfaldast á milli ára,“ bætir hann við.

Vilji skila hagnaði á þessu ári

Neikvæð gengisáhrif eru sögð nema 5,6 milljörðum króna á síðasta ári vegna veikingar bandaríkjadals. Fram kemur í uppgjörinu að lausafjárstaða Icelandair hafi batnað um 14 milljarða króna milli ára og verið 57,6 milljarðar króna í lok árs. 

„Með skýrum áherslum okkar í rekstrinum og frekari umbótaverkefnum þegar í pípunum erum við vel í stakk búin til að skila hagnaði á þessu ári og styrkja félagið til framtíðar því það er sannarlega komið að því að hluthafar Icelandair uppskeri eftir að hafa staðið með félaginu í mörg ár,“ segir Bogi. 

Fréttin hefur verið uppfærð.