Stólarnir fóru bara allir í fýlu saman og það er ó­af­sakan­legt

Tindastólsliðið átti eina sína verstu viku á síðustu árum í síðustu viku þegar liðið tapaði fyrst fyrir Keflavík og steinlá síðan í toppslagnum á móti Stjörnunni nokkrum dögum síðar. Fjögur töpuð stig í baráttunni um deildarmeistaratitilinn sem er nánast runninn þeim úr greipum.

„Arnar Guðjónsson hefur náttúrulega áhyggjur af þessu öllu saman, út af að hann er náttúrulega bara þjálfari liðsins. Þjálfarar hafa náttúrulega bara almennt mjög miklar áhyggjur. Það var bara mjög skrítin orka yfir þessu liði í þessum leik og það var líka mjög skrítin orka yfir þessu liði á móti Keflavík,“ sagði Stefán Árni Pálsson.

Tindastóll fékk á sig 35 stig í fyrsta leikhluta, var 24 stigum undir í hálfleik, 63-39, og tapaði að lokum með 38 stigum, 125-87, í uppgjöri liðanna sem fóru í lokaúrslitin í fyrra.

„Þeir segjast ekkert vera þreyttir út af Evrópukeppninni og ég trúi því alveg. En hvað er að,“ spurði Stefán Árni sérfræðing sinn Hlyn Bæringsson.

Slæm líkamstjáning

„Hvað er að? Það var sjáanlegur skortur á grimmd og ákafa í leik liðsins. Þeir náðu bara ekkert að svara ákveðninni hjá Stjörnunni, bara aldrei,“ sagði Hlynur.

„Það voru líka slæmar líkamstjáningar hjá leikmönnum liðsins, þannig að menn voru með hausinn niður, fljótir að gefast upp, fórnuðu höndum og kenndu öðrum um. Það getur gerst á bestu bæjum þegar þetta er svona slæmt,“ sagði Hlynur.

Umræða um að það sé verið að skipta út erlendu leikmönnum liðsins gæti verið að hafa áhrif á liðið að mati Hlyns.

Þeir bara einfaldlega löbbuðu yfir þá

„Áran var ekki sérstök og mögulega er það vegna þessarar umræðu sem hefur komið upp, óheppileg eins og hún er. Ég veit ekki hvort það hafi eitthvað komist þarna inn því ég geri mér ekki grein fyrir því. Þannig að það var eitthvað ‚off' við liðið,“ sagði Hlynur.

Hann nefnir Adomas Drungilas sem leikmann sem var klár í slaginn.

„Það voru bara of fáir sem voru tilbúnir að mæta orkunni sem Stjarnan kom með og þeir bara einfaldlega löbbuðu yfir þá,“ sagði Hlynur.

Stefán Árni spurði Magnús Þór Gunnarsson út í líkamstjáninguna hjá Stólunum.

Sjálfkrafa dregur það hina leikmennina með niður

„Hún skiptir bara gríðarlega miklu máli og það er svo leiðinlegt þegar þínir bestu hestar fara að lyfta öxlum, vera fúlir og eitthvað svona, þá sjálfkrafa dregur það hina leikmennina með sér niður,“ sagði Magnús.

„Það er ekkert meira pirrandi heldur en það. Þá þarf einhver af hinum, Arnar, Sigtryggur, Pétur eða Júlíus, að bauna yfir þessa útlendinga og segja þeim að rífa hausinn út úr rassgatinu á sér og halda áfram. En það gerðist ekkert. Það fóru bara allir í fýlu saman og þar er óafsakanlegt hjá Tindastól. Þeir voru hrikalega lélegir í dag,“ sagði Magnús.

Hann getur ekki unnið neitt

En hversu miklar áhyggjur hefur Arnar þjálfari af stöðunni?

„Við erum búin að tala um [Dedrick] Basile í mörg ár um að hann geti ekki unnið neitt og ég held að það sé bara að sýna sig núna að þetta er ekki rétti leikmaðurinn fyrir þetta lið,“ sagði Magnús Þór og Hlynur tók undir það.

„Ég held það sé augljóst. Ég held að Arnar væri alveg til í að glugginn væri opinn aðeins lengur,“ sagði Hlynur.

Dedrick Basile var með 13 stig og 8 stoðsendingar á móti Stjörnunni en hitti aðeins úr 29 prósent skota sinna (4 af 14).

Það má hlusta á alla umræðuna um vandræði Stólanna hér fyrir ofan. Næst á dagskrá hjá þeim er undanúrslitaleikur á móti KR í bikarnum í Smáranum í kvöld. Leikurinn hefst klukkan 20.00.