Ingvar Freyr nýr hag­fræðingur BHM

Í fréttatilkynningu þess efnis segir að starfsferill Ingvars Freys spanni fjölbreytt verkefni á sviði efnahagsmála, í stefnumótun, greiningu og hagsmunagæslu á ólíkum sviðum vinnumarkaðarins.

Ingvar hafi lokið M.Sc.-gráðu í hagfræði með áherslu á orku- og loftslagshagfræði frá norska umhverfis- og lífvísindaháskólanum (NMBU) í september 2016, kennsluréttindum frá HÍ árið 2012 og B.S.-gráðu í hagfræði frá sama skóla árið 2011. Samhliða námi hafi hann starfað sem sérfræðingur hjá hagfræðideild Landsbankans og við tölfræðilega greiningu hjá Seðlabanka Íslands. Þá hafi hann kennt hagfræði og skyldar greinar, bæði í MR og við Opna háskólann í Reykjavík, sem og HÍ og NMBU.

„Við bjóðum Ingvar velkominn til starfa og hlökkum til að njóta sérfræðiþekkingar og reynslu hans innan BHM,“ er haft eftir Kolbrúnu Halldórsdóttur, formanni BHM.