„Höldum á­fram að berjast til að reyna að sleppa við fallið“

Óskar og hans menn máttu þola 30 stiga tap er liðið heimsótti Þór í fallbaráttuslag í Bónus-deildinni í kvöld. Lokatölur 105-75, en Óskar benti kannski réttilega á að það hafi vantað lykilmenn í hans lið í kvöld.

„Það vantar bæði fimmu og fjarka í þetta lið eins og það er í dag og það er bara erfitt að spila þannig. Þór á bara mikil hrós skilið fyrir það hvernig þeir leystu úr þessu. Í fyrri hálfleik vorum við að reyna að spila einn á einn á þá í póstinum og þá bara réðust þeir á okkur. Í seinni hálfleik breyttum við til og settum tvo menn og þá bara koma þeir boltanum út á opna skotmenn. Þannig bara vel spilað hjá þeim, en við verðum að gera betur.“

Meðal þeirra sem vantar í ÍA-liðið er Gojko Zudzum, sem hefur verið besti leikmaður liðsins í vetur, en hann er frá vegna meiðsla.

„Við tökum bara stöðuna á honum á hverjum degi. Við vorum að vonast eftir honum í þennan leik, en það er bara erfitt með þessi hnémeiðsl. Við viljum ekki byrja of snemma og missa hann út restina af tímabilinu.“

Þá voru Skagamenn einnig Kanalausir í kvöld.

„Við létum Dibaji (Walker) fara og erum bara að bíða eftir nýjum Ameríkana.“

En aftur að leiknum sjálfum. Óskar segir það hafa sagt sögu leiksins að Djordje Dzeletovic hafi skorað 25 stig og tekið 10 fráköst í fyrri hálfleik.

„Mér fannst það bara svolítið saga leiksins. Ég get verið rosalega dramatískur og sagt að allt sé að fara til andskotans hjá okkur, en mér fannst við bara vera of litlir.“

„Mér fannst þetta ekki vera neitt hræðileg frammistaða frá mörgum. Það koma fullt af strákum inn af bekknum hjá mér með góð orku og berjast.“

Að lokum segir hann sárt að horfa til þess að hafa tapað með 30 stigum í kvöld, í leik sem nýliðar ÍA horfðu á sem leik þar sem þeir hefðu mögulega átt að geta tekið stig.

„Algjörlega. Við unnum þá með tíu stigum í fyrri leiknum og við vitum það alveg að þegar við erum með heilt lið að þá eigum við að standa í þessum liðum. Það kemur leikur á eftir þessum leik og við höldum bara áfram að berjast til að reyna að sleppa við fallið.“