Sleppir ekki pítsunum þrátt fyrir eitt óhappatilvik

Kristján Óli Níels Sigmundsson rekur söguna í samtali við fréttastofu, en fundurinn vakti mikla athygli á Facbeook-hópnum Matartips í gær. Pítsan var keypt í Krónunni Reykjanesbæ og er af tegund sem Kristján kaupir iðulega. 

„Við erum að taka pítsuna úr pakkningunni þegar svo heppilega vill til að hún snýr öfugt. Þá blasir hnífur við inni í pakkningunni, alveg ágætlega stór hnífur,“ segir Kristján.

Sjálfur vinnur hann hjá framleiðslufyrirtæki og grunar að hnífurinn hafi orðið eftir í deiginu þegar það var skorið við framleiðslu. 

„Krónan er búin að hafa samband við mig og er komin með pítsuna til sín. Þau ætla að senda hana til framleiðandans sem ætlar að reyna að komast að því hvernig þetta náði að atvikast,“ segir Kristján. 

Hann kann Krónunni miklar þakkir fyrir skjót viðbrögð og segir ljóst að gæði og öryggi viðskiptavina sé í fyrirrúmi hjá viðskiptavinum. 

Kristján segist þó ekki hættur að kaupa pítsurnar, sem eru af tegundinni Italpizza. Í raun hafi hann keypt aðra pítsu af sömu tegund þegar hann fór í Krónuna til að skila hinni vopnuðu pítsu.

„Það var reyndar ekki til pepperónípítsa þannig að ég keypti með skinku í staðinn. Þetta er svo sem ekki í fyrsta skipti sem ég kaupi svona og finnst þær mjög góðar. Ég hætti ekkert að kaupa svona þrátt fyrir eitt óhappatilvik.“

Guðrún Aðalsteinsdóttir, framkvæmdastjóri Krónunnar, segir í skriflegu svari til Mbl.is vegna málsins að pítsur með sama lotunúmer hafi verið teknar úr sölu. Málið sé tekið alvarlega.