Leigan rukkuð mánaðarlega en ekki í lokin

Árni Sæberg skrifar 17. desember 2025 16:19

Jón Finnbogason er framkvæmdastjóri Stefnis.

Stefnir, sem rekur sex sjóði fyrir verktaka sem bjóða upp á svokallað sameignarform í fasteignaviðskiptum, hefur gjörbreytt forminu í kjölfar breytinga sem Seðlabankinn gerði nýverið á lánþegaskilyrðum. Breytingarnar fela í sér að leiga fyrir eignarhlut verktakans verður greidd mánaðarlega í stað þess að safnast upp.

Í tilkynningu á vef Stefnis segir að með þessu sé komið til móts við ákvörðun fjármálastöðugleikanefndar Seðlabankans um að herða lánþegaskilyrði vegna sameignarsamninga.

„Sameignarformið mun áfram nýtast fólki við að komast inn á markaðinn með minna eiginfjárframlagi með því að byggingaraðili verður meðeigandi íbúðarinnar en greiðslubyrðin eykst sem nemur mánaðarlegri húsaleigu til meðeigandans. Húsaleigan mun greiðast með hefðbundnum hætti í upphafi hvers mánaðar, líkt og tíðkast á almennum leigumarkaði.“

Auki líkur á að vandað sé til verka

Þá bæti það stöðu kaupenda að byggingaverktakar fylgi sínum eignum eftir til tíu ára í gegnum eignarhald í sjóði. Með því séu líkurnar enn meiri að um sé að ræða vandaðar eignir, að því er segir í tilkynningu Stefnis.

Þeir byggingaraðilar sem bjóði upp á sameignarformið séu Reir verk, ÞG, Kauplykill, Safír, Umbra og Öxar.

„Fleiri munu væntanlega bætast við á næstu vikum en viðtökur fasteignarkaupenda við þessum nýja valkosti hafa verið afar góðar.“

Verði einfaldara og aðgengilegra

Leiguverð sameignaríbúða sem seldar verða á þennan hátt verði nú ekki lengur bundið við hlutfall af kaupverði heldur föst fjárhæð. Leiguverð geti þannig verið mismunandi milli fasteigna og sjóða, sem stuðli að aukinni samkeppni um hagstæð kjör. Leigufjárhæðin sjálf verði verðtryggð líkt og almennt tíðkast í langtíma leigusamningum, enda verði um tíu ára leigusamninga að ræða.

Sjóðirnir sem eru í eigu byggingaraðila en í rekstri Stefnis kaupi ýmist 20 til 25 prósenta hlut í fasteignum með kaupendum. Greitt sé fyrir hlut meðeigandans með mánaðarlegri leigugreiðslu sem tekið sé tillit til við greiðslumat kaupenda. Breytingunum sé ætlað að stuðla að því að sameignarformið verði aðgengilegra og einfaldara í framkvæmd.

„Með breytingunum er ársleiga ekki lengur miðuð við fimm prósetn af kaupverði sjóðanna auk þess sem frestun á greiðslu húsaleigu er felld brott og þar með uppsöfnun ógreiddrar húsaleigu. Báðir þættir draga úr áhættu meðeigenda á þróun fasteignaverðs. Gerður verður einfaldur leigusamningur á milli meðeiganda og sjóðanna sem kemur til móts við ábendingar um að sameignarformið kunni að vera flókið fyrir kaupendur að átta sig á.“

Byggingariðnaður Fasteignamarkaður Fjármálafyrirtæki Húsnæðismál Seðlabankinn

Mest lesið

Fleiri fréttir