Mikið við­bragð vegna umferðarslyss

Grétar Stefánsson, aðalvarðstjóri hjá lögreglunni á höfuðborgarsvæðinu, segir að um alvarlegt slys sé að ræða. Tveir bílar skullu saman, þeir virðast hafa komið hvor úr sinni áttinni. Ekki sé hægt að staðfesta það að svo stöddu. Enn sé unnið að því að tryggja vettvang.

Einn hefur verið fluttur af vettvangi á sjúkrahús að sögn Lárusar Steindórs Björnssonar, varðstjóra hjá slökkviliðinu á höfuðborgarsvæðinu. Ekki liggur fyrir hvert ástand hins slasaða er, sem var einn í bílnum. Einn ökumaður var í hinum bílnum.

Tilkynningin barst um tíu mínútur í fimm. Sjónarvottar segja í samtali við fréttastofu að fjöldi viðbragðsaðila eru á vettvangi. 

Á vefsíðu Vegagerðarinnar, umferðin.is, segir að veginum hafi verið lokað í báðar áttir vegna slyssins. Á myndavélum Vegagerðarinnar sést að bílaröð hefur myndast við slysstað.

Í tilkynningu frá lögreglunni á höfuðborgarsvæðinu segir að lokað verði fyrir umferð í óákveðin tíma á meðan viðbragðsaðilar eru við störf. Engar frekari upplýsingar verði veittar að svo stöddu.

Fréttin verður uppfærð.