ESB sektar samfélagsmiðil Musk um milljarða

Framkvæmdastjórn ESB tilkynnti um sektina í dag en hún er niðurstaðan tveggja ára langrar rannsóknar á X sem er í eigu Elons Musk, ríkasta manns í heimi.

Sektin er vegna þriggja brota á ákvæðum laga um stafræna þjónustu (DSA) sem tengjast gagnsæi. Eitt þeirra tengist auðkenningu X á notendum sem Evrópusambandið telur blekkjandi og geti leitt til svika og falsana. 

Áður en Musk keypti Twitter, sem miðillinn hét þá, voru ákveðnir notendur auðkenndir með bláu merki til þess að staðfesta að hann væri raunverulega sá sem hann segðist vera. Á meðal þeirra sem höfðu slíka auðkenningu voru þjóðarleiðtogar, þekktir einstaklingar, stofnanir og fjölmiðlar.

Eftir kaup Musk og breytinguna í X hóf miðillinn að selja bláu merkin til notenda. Með því að kaupa slíkt merki urðu notendur sýnilegri á miðlinum.

Þá telur sambandið að auglýsingar á X séu ekki nægilega gagnsæjar. Samkvæmt evrópskum lögunum ber fyrirtækjum að halda gagnasafn um auglýsingar sem þau birta, þar á meðal um hver greiddi fyrir þær og að hverjum þær beindust. Þær reglur eiga að gera rannsakendum kleift að hafa upp á svindlurum og skipulögðum áróðursherferðum.

AP-fréttastofan segir að líklegt sé að sektin fari öfugt ofan í Bandaríkjastjórn sem hefur hótað Evrópusambandinu refsiaðgerðum ef bandarísk fyrirtæki þurfa að beygja sig undir evrópskar reglur. Musk var einn nánasti samverkamaður Donalds Trump í fyrra og fram á þetta ár.