Upp­gjörið: Ís­land - Úrúgvæ 33-19 | Stór­sigur og Ís­lendingar í milli­riðil

Ísland mætti Úrúgvæ í lokaleik riðlakeppni HM þar sem Ísland vann 14 marka stórsigur og tryggði sig í leiðinni farseðilinn í milliriðil. Lokatölur frá Stuttgart, 33 - 19 fyrir Ísland.

Fyrir leikinn í dag mátti ætla að Ísland væri umtalsvert sigurstranglegra liðið og svo varð vissulega raunin. Ísland byrjaði leikinn betur og skoraði fyrstu þrjú mörk leiksins og gaf tóninn fyrir það sem koma skyldi. Hægt og bítandi jókst forystan en íslenska liðið sýndi úrúgvæska liðinu enga miskunn. Fagmannleg frammistaða myndi einhver segja en munurinn tíu mörk í hálfleik, staðan 17-7.

Eins og gengur og gerist í svona leikjum dofnaði aðeins yfir leik Íslands sem hélt þó áfram að auka forystuna. Svo fór að lokum Ísland vann afar sannfærandi 14 marka sigur, 33- 19 eins og áður segir.

Það verður að segjast að jafnvel þó svo að andstæðingurinn í dag hafi ekki verið sá sterkasti þá getur liðið tekið fullt af jákvæðum hlutum úr þessum leik en það verður spennandi að sjá þær leika í milliriðlinum.

Stjörnur og skúrkar

Sandra Erlingsdóttir var atkvæðamest í íslenska liðinu með sex mörk þar af fjögur úr vítum. Thea Imani Sturludóttir átti góðan leik en hún skoraði fimm mörk úr sex skotum. Þá gerðu þær Elísa Elíasdóttir, Þórey Anna Ásgeirsdóttir og Alfa Brá Oddsdóttir Hagalín allar fjögur mörk.

Skotnýting íslenska liðsins var frábær í dag eða 72 prósent sem ber sérstaklega að fagna.

Þær Hafdís Renötudóttir og Sara Sif Helgadóttir stóðu sitthvorn hálfleikinn milli stanganna og skiluðu báðar af sér góðri frammistöðu. Hafdís varði sjö skot (50 prósent) og þá varði Sara 5 skot (29 prósent). Þá vörðu þær stöllur báðar eitt víti hvor.

Atvik leiksins

Rakel Oddný Guðmundsdóttir skoraði glæsilegt mark úr hraðaupphlaupi. Íslenska vörnin stóð þétt og tókst að stöðva sendingu Úrúgvæ á línuna. Hafdís sá Rakel og kastar fram á hana en það benti allt til þess að þessi sending væri of löng en Rakel gerði ótrúlega vel í að grípa og klára þetta hraðaupphlaup á einhvern ótrúlegan hátt.

Dómarinn

Fín frammistaða en þetta var vissulega ekki erfiðasti leikur sem þeir félagar hafa dæmt.

Hvað gerist næst?

Ísland er komið í milliriðil á HM þar sem liðið mætir Svartfellingum, Færeyjum og Spáni. Fyrsti leikur er á þriðjudag en leikið verður í Dortmund. Það verður spennandi að sjá stelpurnar okkar í næstu þremur leikjum en það má sjá augljósan stíganda hjá þeim undanfarinn mánuð.

Viðtöl