Karlotta fyrst til að fá öll höfuðfötin og vill fleiri

Meðlimir í 100 kílómetra klúbbnum eru núna yfir 400 talsins og var glatt á hjalla á fundinum í gær.

Veittar eru sérstakar derhúfur fyrir hlaupara fyrir að ná þeim áfanga að hlaupa 100 kílómetra, 100 mílur, 200 mílur og 400 kílómetra, og svo fæst sérstakur hattur fyrir að hafa klárað 500 kílómetra.

Karlotta er nú sú fyrsta til að hafa eignast allt höfuðfatasafnið en fyrr á þessu ári fór hún til að mynda lengstu vegalengd sem Íslendingur hefur farið í keppnishlaupi, þegar hún hljóp 534,8 kílómetra í sex daga Viadal Ultra hlaupinu í Svíþjóð. Þá sló hún einnig eigið Íslandsmet í 48 klukkutíma hlaupi í Danmörku og setti alls fjögur Íslandsmet á fjórum mánuðum.

Karlotta hefur nú lagt til við stjórn félags 100 kílómetra hlaupara að í framtíðinni verði einnig veittar viðurkenningar fyrir að klára 600, 700, 800, 900 og 1.000 kílómetra keppnishlaup.