Sjó­vá hagnast um 666 milljónir það sem af er ári

Í tilkynningu Sjóvár til Kauphallar er haft eftir Hermanni Björnssyni, forstjóra félagsins, að sterkur grunnrekstur endurspegli niðurstöður fyrir bæði þriðja fjórðung sem og fyrir fyrstu níu mánuði ársins. Tekjuvöxtur á fjórðungnum sé í takt við áætlanir en minni en síðustu misseri. Taka verði tillit til þess að markaðshlutdeild Sjóvár hafi vaxið mikið undanfarin ár. Áfram verði lögð áhersla á arðbæran tryggingarekstur með framúrskarandi þjónustu.

Afkoma af fjárfestingum fyrir fjármagnsliði og skatta hafi verið 958 milljónir króna á þriðja ársfjórðungi, sem sé lítillega undir væntingum en í takt við þróun markaða. Allir eignaflokkar hafi skilað jákvæðri afkomu á fjórðungnum. Ávöxtun skráðra hlutabréfa hafi verið 1,0 prósent, óskráðra hlutabréfa 0,2 prósent, ríkisskuldabréfa 2,1 prósent, annarra skuldabréfa 2,1 prósent og safnsins alls 1,7 prósent. Í lok þriðja ársfjórðungs hafi eignasafnið verið 61,2 milljarðar króna.

Tjónaþróun hagfelld

Hagnaður Sjóvár á fyrstu níu mánuðum ársins hafi numið 666 milljónum króna. Þar af hafi hagnaður af vátryggingasamningum fyrir skatta numið 2.447 milljónum og samsett hlutfall 90,6 prósent. Þá hafi tap af fjárfestingastarfsemi fyrir skatta verið 1.013 milljónir króna. 

„Rekstrarniðurstaða á fyrstu níu mánuðum ársins endurspeglar sterkan grunnrekstur samstæðunnar. Tjónaþróun hefur verið hagfelld það sem af er ári, sér í lagi þar sem ekkert stórtjón henti á tímabilinu og útskýrir stórbætta afkomu vátryggingasamninga á milli ára. Afkoma af fjárfestingastarfsemi er undir væntingum á tímabilinu sem helgast af neikvæðri þróun á skráðum hlutabréfum fyrri hluta árs.“

Horfurnar betri

Haft er eftir Hermanni að félagið hafi breytt horfum sínum fyrir árið 2025 og afkoma af vátryggingasamningum sé áætluð um 2.500 til 2.700 milljónir króna í stað 1.700 til 2.400 milljóna og samsett hlutfall á bilinu 92 til 93 prósent í stað 93 til 95 prósent áður. 

Horfur til næstu tólf mánaða séu að afkoma af vátryggingasamningum verði á bilinu 1.900 til 2.600 milljónir króna og samsett hlutfall 93 til 95 prósent. 

„Ekki verða birtar horfur fyrir afkomu af fjárfestingastarfsemi en áætlanir félagsins gera ráð fyrir að ávöxtun fjárfestingaeigna í stýringu nemi 8,5% á ári til lengri tíma miðað við núverandi vaxtastig og fjárfestingastefnu. Ekki verður upplýst um frávik frá afkomu af fjárfestingastarfsemi nema þær verði raktar til verulegra breytinga á óskráðum eignum eða á eignasafni.“