Ó­ljóst hvort veð­hafar fái nokkuð

Þetta er meðal þess sem kemur fram í yfirlýsingu frá skuldabréfaeigendum Fly Play Hf. Þar segir að um sé að ræða fjölbreyttan hóp fjárfesta sem hafi þann 26. ágúst lagt til fjármögnun í formi verðtryggðrar breytanlegrar skuldabréfaútgáfu.

Tilgangur þess var að bæta lausafjárstöðu félagsins á meðan forvarsmenn þess gerðu umfangsmiklar breytingar á viðskiptalíkani Play.

Sjá einnig: Risa­gjald­dagi vegna losunar­heimilda daginn eftir gjald­þrot

Í yfirlýsingunni segir að tilkynningin um rekstrarstöðvun Play síðasta mánudag hafi verið mikið reiðarslag fyrir alla sem tengdust félaginu. Í kjölfarið voru áðurnefnd skuldabréf gjaldfelld.

„Síðan þá hafa skuldabréfaeigendur unnið sleitulaust að því að reyna að lágmarka tjón og hámarka virði þeirra eigna sem gengið var að í samræmi við lög og reglur,“ segir í yfirlýsingunni.

Þar segir að þetta verkefni sé bæði erfitt og flókið og alfarið sé óljóst hvort það muni á endanum skila nokkru til veðhafa. Áhersla er lögð á að tryggja sem besta niðurstöðu fyrir alla hagsmunaaðila. Því eru skuldabréfaeigendur sagðir ætla að eiga í góðu samstarfi við skiptastjóra, enda sé hagur allra að hámarka virði eigna búsins.

Þá segir einnig að rík ástæða sé til að taka fram að fyrrverandi dótturfélag Play á Möltu sé ekki með gilda flugvélaleigusamninga.