Lykilþættir til staðar til að halda matvöruverði lágu

Björgvin var til viðtals í Bítinu á Bylgjunni í morgun. Þáttastjórnendur spurðu hann hvers vegna verðlækkun á innfluttum matvælum væri ekki meira áberandi í ljós sterkrar stöðu krónunnar.

Björgvin sagði slíkar vörur vera að lækka. Um leið og Bónus fái vörur ódýrar að utan vegna styrkingu gjaldmiðils Íslendinga þá sé verðið í verslunum lækkað um leið.

„Sú setning um að það sé ekki að lækka er tilfinning frekar en raunveruleikinn frá okkar bæjardyrum séð,“ sagði Björgvin. Verslunarrisinn keyri lækkun í gegn um leið og hann geti.

Bónus sé í stöðugu samtali við byrgja sína að tryggja lægsta verð.

Keyri á lækkanir eins hart og hægt sé

„Þetta eru okkar ær og kýr. Við vöknum alla daga til að gera nákvæmlega þetta,“ segir Björgvin. Hann segir ótrúlega vel hafa tekist í kjölfar nýlegra kjarasamninga að halda samningum lágum til að verð til neytenda hækkaði eins lítið og hægt var.

„Þetta var tímabil sem við vorum á fullu að reyna að komast að því hvernig við ætluðum ekki að ýta þessu út í verðlagið. Þar liggur pressan frá okkur. Ástæðan fyrir verði út er í raun ástæðan fyrir verði inn. Okkar verkefni er að keyra á lækkanir eins hart og við getum til að almenningur finni ekki fyrir þeim.“

Hann var spurður út í vörur framleiddar á Íslandi, hvort verð á þeim ætti ekki að lækka þegar verð á hráefni að utan lækki vegna styrkingar krónunnar.

Sælgætisverð erfitt

„Hráefnisverðið er stærsti hlutinn þ.a. í rauninni er þetta algjörlega rétt. Við sjáum að margir af okkar framleiðendum hafa þurft að lifa við mjög skrýtna tíma eins og kakóverð og kakómassaverð,“ segir Björgvin. Vísar hann til þess hve mikið súkkulaði hefur hækkað í verði vegna hækkunar á heimsmarkaðsverði á kakó.

„Þess vegna hefur sælgæti eða nammi verið hæst í umræðunni. Vissulega hefur það hækkað og erfitt að brjótast frá því. En ég veit í gegnum okkar samtal við þessa aðila, framleiðenda á réttum eða framleiðendum á sælgæti... Við erum í þannig samtali við þessa aðila að lækka um leið og hægt er.“

Þá sé Bónus stöðugt að breyta neysluhegðun neytenda með því að fjarlægja hluti úr verslun sinni sem séu gríðarlega dýrir.

Tveir lykilþættir til staðar

Að lokum var Björgvin spurður hvort það væri lögmál að á Íslandi þyrfti að vera hátt matarverð.

„Til að svara spurningunni þarf að horfa á tvo þætti, og ég veit að þetta er gríðarlega mikil einföldun. Til að geta verið með lágt verð þarftu tvo þætti: Einn af þeim er magn. Það þurfa að vera aðilar sem eiga nægjanlega mikið magn af viðskiptavinum til að geta verið mjög hagkvæmir. Svo er það samkeppnin. Við teljum að þessi markaður sem við horfum á hafi þessi element. Það er rosalega mikil samkeppni á þessum markaði. Við viljum koma því til skila að fólk fatti að það eru ákveðin element sem gefa okkur það að vera ekki gríðarlega dýr og ósamkeppnisfær upp á það að gera.“