Risaáfangi Hildar Maju í Úsbek­istan

Hildur var að keppa á heimsbikarmóti í Tashkent í Úsbekistan og gerði sér lítið fyrir og vann silfur í gólfæfingum í dag.

Hún hafði komist í úrslit á tveimur áhöldum, tvíslá og gólfi, og skráði sig í sögubækurnar á seinna áhaldinu í dag.

Á vef Fimleikasambandsins segir að Hildur hafi mætt einbeitt í gólfæfingarnar og með það að markmiði að næla í verðlaun, sem hún gerði. Hún fékk 12,250 stig fyrir æfingarnar sínar.

Aðeins hin króatíska Antea Kaucic fékk hærri einkunn eða 12,350. Kira Maharevich fékk 12,200 stig og vann bronsverðlaun.

Í úrslitum á tvíslá í gær hafnaði Hildur í 8. sæti en á meðal keppenda var ríkjandi Ólympíumeistari á tvíslá.