Tann­læknir keppir á opna banda­ríska

Matt Vogt mun spila með þeim Scottie Scheffler og Rory McIlroy á mótinu en það er ekkert skrýtið þótt að golfáhugafólk kannist ekki við þetta nafn.

Vogt er ekki atvinnumaður í golfi og ætlar sér ekki að verða það heldur.

Vogt er tannlæknir í Indiana sem hefur komið sér vel fyrir í því starfi.

Vogt spilaði hins vegar golf þegar hann var í Butler háskólanum en hætti því til að einbeita sér að náminu.

Fyrir nokkrum árum var hann síðan búinn að koma upp tannlæknastofunni og hún fór að ganga vel.

Hann fékk því meiri tíma utan vinnu og fór að eyða honum á golfvellinum.

Það fór líka að skila sér. Hann vann Opna Indianapolis áhugamannamótið tvö ár í röð.

Nú fær hann að keppa á opna bandaríska risamótinu í golfi sem áhugamaður.

Það gerir þessa sögu enn merkilegri er að Vogt ólst upp í Pittsburgh. Hann var kylfusveinn á Oakmont golfvellinum þegar hann var krakki.

Opna bandaríska meistaramótið fer einmitt fram á þessum Oakmont golfvelli í Pittsburgh sem Vogt þekkir svo vel. Hann er því eiginlega á heimavelli á mótinu.

Opna bandaríska meistaramótið í gofli verður sýnt beint á SÝN Sport Viaplay og útsending frá fyrsta deginum hefst klukkan 16.00 í dag.