Rut bætist í stóran hóp sem kvatt hefur lands­liðið

Rut greinir frá þessu í samtali við mbl.is í dag en segir jafnframt að handboltaferlinum sé ekki lokið því hún hyggist standa við samning sinn við Hauka um að spila með liðinu á næstu leiktíð. 

Hún lék alls 124 A-landsleiki og skoraði í þeim 249 mörk. Síðustu landsleikir Rutar voru í apríl þegar Ísland gjörsigraði Ísrael og tryggði sér sæti á sínu þriðja stórmóti í röð; HM sem fram fer í Þýskalandi og Hollandi í lok þessa árs.

Þessi 34 ára, örvhenta skytta hóf ferilinn með HK en lék svo um árabil í Dannmörku og vann til að mynda EHF-bikarinn með Holstebro árið 2013.

Rut kom svo til KA/Þórs árið 2020 og átti þátt í fullkomnu tímabili liðsins sem fram að því var titlalaust en varð Íslands-, bikar- og deildarmeistari í fyrsta sinn á fyrsta tímabili Rutar. Í vetur varð hún svo bikarmeistari á fyrsta tímabili sínu með Haukum.

Eins og fyrr segir bætist Rut nú í hóp leikmanna sem kvatt hafa landsliðið. Af þeim 18 leikmönnum sem valdir voru fyrir HM í desember síðastliðnum eru nú alls sex ekki tiltækar en þær eru þó ekki allar hættar. Þórey Rósa Stefánsdóttir og Steinunn Björnsdóttir lögðu skóna á hilluna í vor, og Sunna Jónsdóttir hætti í landsliðinu og taldi líklegt að skórnir væru alfarið farnir á hilluna. Þá lagði Hildigunnur Einarsdóttir, sem var í EM-hópnum fyrir einu og hálfu ári, skóna á hilluna í vor.

Við þetta bætist að Berglind Þorsteinsdóttir hefur tekið sér hlé frá handbolta til að jafna sig eftir ítrekuð hnémeiðsli og þá er Perla Ruth Albertsdóttir ólétt.