Tap út­gerðarinnar vegna fjár­festinga í fisk­eldi nemur milljörðum

Síldarvinnslan festi kaup á 34,2 prósenta hlut í Arctic Fish Holding AS, sem er eini eigandi Arctic fish ehf., sem er eitt af stærstu laxeldisfyrirtækjum á Íslandi og rekur eldisstöðvar á Vestfjörðum, árið 2022.

Bókfært verð nánast tvöfalt hærra en markaðsverð

Kaupverðið fyrir hlutunum, sem voru alls 10.899.684, var 1.089.968.400 norskra króna, sem samsvarar um 13,66 milljörðum króna á gengi dagsins í dag. Markaðsvirði félagsins er 1,737 milljarðar norskra króna og hlutur Síldarvinnslunnar því 594 milljónir norskra króna virði. Það gerir markaðsvirði hluta Síldarvinnslunnar því rétt tæplega 7,5 milljarðar króna. Það gerir um 6,16 milljarða króna óinnleyst tap á tæpum þremur árum.

Í ársreikningi Síldarvinnslunnar fyrir síðasta ár segir aftur á móti að í lok síðasta árs hafi bókfært verð hlutar félagsins í Arctic fish numið 111 milljónum Bandaríkjadala, sem félagið gerir upp í. Það gerir 14,1 milljarð króna.

Svipuð saga af Ísfélaginu og Kaldvík

Svipaða sögu er að segja af fjárfestingu Ísfélagsins í Kaldvík árið 2023. Þá keypti Ísfélagið 16 prósenta hlut í Ice Fish Farm AS fyrir um 8,6 milljarða króna. Verðið í viðskiptunum miðaði við 43 norskar krónur á hlut, sem var tæplega sjötíu prósentum yfir markaðsgengi þá. Nafni félagsins var síðar breytt í Kaldvík. 

Gengi félagsins stendur nú í 16,5 norskum krónum á hlut, sem er tæplega 62 prósentum lægra en þegar Ísfélagið keypti í félaginu. Markaðsvirði þess er nú 27,5 milljarðar króna og hlutar Ísfélagsins því 4,4 milljarða króna. Það gerir óinnleyst tap Ísfélagsins um 4,2 milljarða á tveimur árum.

Með skýringar á reiðum höndum

Í ársreikningi Ísfélagsins fyrir árið 2024 segir að eignarhlutur félagsins í Kaldvík sé bókfærður á 66 milljónir dala, ríflega 8,4 milljarða króna á gengi dagsins, og sé færður samkvæmt hlutdeildaraðferð.

Markaðsgengi Kaldvíkur í árslok 2024 hafi verið 28,6 norskar krónur á hlut. Það sé mat stjórnenda að markaðsverð félagsins endurspegli ekki raunvirði félagsins þar sem um sé að ræða óskilvirkan markað, lítil velta sé og framboð á bréfum mjög takmarkað, þar sem eignarhald Kaldvík sé þröngt. 

Félagið hafi framkvæmt virðisrýrnunarpróf vegna vísbendinga um mögulega virðisrýrnun vegna mismunar á bókfærðu verði og verði á markaði í árslok 2024 en mismunurinn hafi numið 17 milljónum dala. Niðurstaða virðisrýrnunarprófsins hafi verið að bókfært verð standi undir virði eignarinnar. Mat stjórnenda Ísfélagsins sé því að ekki sé þörf á að færa virðisrýmun vegna eignarhlutans.