Gefur kost á sér þrátt fyrir „krank­leika“ í vetur og á ekki von á „heiftúðlegum á­tökum“

Frestur til að bjóða sig fram til formanns Samfylkingarinnar er runnin út og er Kristrún því ein í framboði. Fólki gefst hins vegar kostur á að bjóða sig fram í önnur embætti innan stjórnar til klukkan hálf fjögur á föstudag og kosið verður um þau á landsfundi sama dag. 

Sjá einnig: Kristrún ein í framboði til formanns

Guðmund­ur Árni Stef­áns­son, oddviti Samfylkingarinnar í Hafnarfirði og sitjandi varaformaður, greindi frá því í gær að hann sækist eft­ir end­ur­kjöri og sagði samstarf innan stjórnar flokksins hafa gengið vel.

„Góð samstaða milli okkar og stjórnarinnar allrar og ég held að það skipti máli ekki síst núna þegar við leiðum nýja ríkisstjórn að það sé stöðugleiki og festa í stærsta flokki þjóðarinnar,“ sagði Guðmundur í viðtali við fréttastofu.

Ekki heyrt af mótframboði

Óvíst er hvort það stefni í varaformannsslag. Heiða Björg Hilmisdóttir, borgarstjóri og fyrrverandi varaformaður sem sóttist ekki eftir endurkjöri þegar Guðmundur Árni tók við 2022, sagði að hún ætli ekki að gefa aftur kost á sér núna. Þá ætlar Jóhann Páll Jóhannsson, umhverfis- og loftslagsráðherra, ekki að gefa kost á sér.

Guðmundur segist ekki hafa heyrt af mótframboði.

„Ég held að þessi landsfundur okkar verði fagnaðarfundur og kraftmikill. Þannig ég á ekki von á heiftúðlegum átökum. Aðrir flokkar sjá um það,“ segir hann.

Guðmundur hugðist sækjast eftir oddvitasæti í Suðvesturkjördæmi í síðustu Alþingiskosningum en dró framboð sitt til baka af heilsufarsástæðum og lýsti yfir stuðningi við Ölmu Möller, núverandi heilbrigðismálaráðherra. Hann segist nú í góðu formi.

„Ég fékk krankleika sem gerði það að verkum að ég treysti mér ekki til þess að fara í þingframboð með þeim verkefnum sem þar fylgja en nú er það bara komið fyrir vind,“ sagði hann.

Mikilvægt að landsbyggðin hafi fulltrúa í forystunni

Arna Lára Jónsdóttir, þingmaður Norðvesturkjördæmis, er sitjandi ritari Samfylkingarinnar og hefur ekki greint frá því hvort hún hyggist gefa kost á sér áfram. Enn sem komið er hefur því bara einn boðið sig fram í embætti ritara. 

Guðný Birna Guðmundsdóttir, bæjarfulltrúi Samfylkingarinnar í Reykjanesbæ, tilkynnti framboð sitt til ritara á Facebook upp úr hádegi í dag.

„Ég hef tekið ákvörðun um að bjóða mig fram sem ritara í stjórn Samfylkingar á komandi landsfundi næstu helgi,“ sagði Guðný í færslunni. 

Guðný hefur verið setið í bæjarstjórn Reykjanesbæjar fyrir Samfylkinguna síðan 2014, hefur verið oddviti flokksins síðan í byrjun árs 2024 og er nú forseti bæjarstjórnar. 

„Ég tel mikilvægt að fulltrúi frá landsbyggðinni sé hluti af stjórn Samfylkingar, sér í lagi þar sem mikilvæg barátta er fram undan um sveitastjórnarkosningar. Þetta er stóra verkefnið okkar fram undan en auk þess þurfum við að halda sterkri forystu og stækka flokkinn okkar með fólki sem trúir á okkar góðu verk.

Gjaldkerinn vill endurnýja umboð sitt

Jón Grétar Þórsson, sitjandi gjaldkeri Samfylkingarinnar og varabæjarfulltrúi í Hafnarfirði, greindi frá því á Facebook á fimmtudag að hann hygðist gefa kost á sér áfram til gjaldkera. 

Hann hefur gengt embættinu frá 2022 og hefur gegnt ýmsum öðrum störfum innan flokksins, svo sem formennsku í Samfylkingarfélagi Hafnarfjarðar 2016–2022 og í hafnarstjórn fyrir hönd Samfylkingarinnar frá árinu 2018.

Ekki náðist í Örnu Láru við skrif fréttarinnar.