Páska­egg allt að fjórðungi dýrari en í fyrra

Í lágvöruverðsverslunum hækkar meðalverð á páskaeggjum um 12 til 17 prósent milli ára. Minnst hækkar verð í Krambúðinni og 10-11, en mest hækkar það í Extra og Kjörbúðinni, um 25 til 27 prósent milli ára.

Í fréttatilkynningu frá verðlagseftirliti ASÍ segir að verðlagskönnun á páskaeggjum hafi verið framkvæmd síðasta laugardag. Daginn eftir hafi Nettó lækkað verð á páskaeggjum um 3,6 prósent og þau séu nú iðulega á sama verði og í Krónunni.

Ódýrust í Prís, dýrust í Iceland

Prís hafi boðið lægsta verðið á öllum 12 páskaeggjum sem þar voru til sölu, en það hafi verið fjögur frá Freyju, þrjú frá Góu og sex frá Nóa Síríus. Iceland hafi að jafnaði verið með hæsta verð á páskaeggjum, en þau hafi að meðaltali kostað helmingi meira í Iceland en þar sem þau voru ódýrust.

Bónus og Krónan hafi verið skammt undan, að meðaltali hársbreidd frá lægsta verði, og verið með mest úrval, eða 45 til 48 íslensk páskaegg. Í Fjarðarkaupum hafi fundist 39, að meðaltali rúmum 3 prósentum frá lægsta verði.

Stærðarhagkvæmni í páskaeggjakaupum

Þá segir að páskaeggin séu misstór en þegar kílóverð séu borin saman sjáist að að Freyjupáskaeggin séu dýrust, Nóaeggin næstdýrust og Góuegg ódýrust.

Bestu kaupin, sé planið að torga kílógrammi af sætindum, sé risaeggið frá Bónus eða Góu páskaegg númer 11. Í viðráðanlegri stærðum séu sérframleiddu verslanaeggin hagkvæmust. Bónusegg, Krónuegg og Okkar egg í Nettó kosti reyndar 17 til 20 prósentum meira á kílóið, en séu mun smærri.

Mjólkurlaust Nóa egg númer 4 kosti um 7 prósentum meira en svipað stórt Nóaegg með mjólkursúkkulaði og Freyju suðusúkkulaðiegg kosti 17 prósentum meira, í kílóverði talið, en Freyju fjöregg, sem sé af svipaðri stærð.

Útlagar skýra hækkun í Kjörbúðinni að hluta

Loks segir að mikil hækkun á páskaeggjaverði í Kjörbúðinni skýrist af fimm páskaeggjum sem hafi hækkað um meira en helming frá því í fyrra.

• Góu páskaegg og hraunegg númer 1 hafi tvöfaldast í verði, úr rúmum 150 krónum í 295 krónur.
• Freyju fjöregg númer 6 hafi hækkað úr 2.399 krónum í 4.199 krónur. Það hafi í fyrra verið svipað dýrt og í Bónus en sé nú 52 prósentum dýrara.
• Nóa ljóst páskaegg númer 1 hafi hækkað úr 241 krónu upp yfir 370 krónur.

Án þessara fimm páskaeggja hafi meðalhækkun á verði páskaeggja í Kjörbúðinni verið 21 prósent.