Rukkað því fólk hékk í rennunni

Flestir kannast við að stoppa í rennunni Við Keflavíkurflugvöll þegar verið er að skutla vinum og vandamönnum á flugvöllinn. Á orgun verður farið að taka gjald þegar stoppað er lengur en fimm mínútur.

„Það hefur sem sagt komið í ljós að fólk hefur jafnvel verið að staldra lengur en æskilegt er í rennunni. Það hefur valdið töfum, það er að segja það hafa myndast raðir, og fyrirsjáanlegt að þetta geti truflað viðbragðsaðila ef þeir þurfa að komast að flugstöðinni,“ segir Guðjón Helgason, samskiptastjóri Isavia.

Hann segir fjölmarga rekstraraðila hafi kallað eftir því að eitthvað yrði gert til að bregaðst við þessu. Niðurstaðan er sú að fyrstu fimm mínúturnar er frítt að leggja á svæðinu en eftir það kostar hver mínúta 500 krónur. Sólarhringur á svæðinu kostar 50 þúsund.

Guðjón segir að 80 prósent þeirra sem fara um rennuna staldri við skemur en fimm mínútur.

„Það eru vissulega 20 prósent notenda sem eru þá að nota hana lengur, sem er óæskilegt. Og átta prósent sem eru meira að segja að nota hana í 16-20 mínútur, sem er algjörlega óásættanlegt.“

Þeir sem þurfi aðeins lengri tíma til að komast inn í flugstöðina þurfi ekki að örvænta.

„Þá höfum við tekið þá ákvörðun að lengja gjaldfrjálsa tímann á skammtímastæðunum okkar, P2, komumegin við flugstöðina þannig að fólk geti verið lengur og það er farið úr fimmtán mínútum í hálftíma,“ segir Guðjón.