Eignar­halds­félag Ingu og hirðin hennar

Ég er ekki hissa á að stjórnarmyndunarviðræðurnar hafi tekið svona stuttan tíma, eins og raun bar vitni fyrir Ingu og hirðina hennar því hún seldi hugsjónina og stefnuna á útsölu bara til þess eins að komast til valda. Reyndar held ég að stefnan hafi verið engin og ekki heldur hugsjónin, þetta hafi allt saman verið eitt leikverk í gegnum árin. Ég spái því að þessi flokkur hennar eigi eftir að þurrkast út eins og Vinstri grænir og Píratar. Það verður engin eftirspurn eftir slíkum flokki sem fer bara eftir því hver vindáttin er hvert hann stefnir.

Hefur einhvern tímann verið haldinn landsfundur hjá flokknum sem hlýtur að vera erfitt þar sem flokkurinn er ekki skráður sem stjórnmálasamtök, svo ég vitni beint í Morgunblaðið: „Skrifstofa Alþingis hefur staðfest að Flokkur fólksins uppfylli ekki skilyrði fyrir úthlutun fjárstyrkja til stjórnmálaflokka. Flokkurinn hefur þegið 240 milljónir króna þrátt fyrir að vera enn skráður sem „félagasamtök“ í fyrirtækjaskrá.“

240 milljónir í ríkisstyrk til flokks sem er ekki skráður sem stjórnmálaflokkur

Ekki ætlar fjórða valdið, fjölmiðlar þessa lands, að láta hana komast upp með það að segja að þetta hafi bara verið mistök þar sem liðin eru átta ár síðan það átti að skrá Flokk fólksins sem stjórnmálasamtök?

Hvaða leikrit er þetta og getur svona flokkur setið í ríkisstjórn Íslands? Hver er trúverðugleikinn hérna? Það kæmi mér ekki á óvart að þarna sé einhver bókhaldsleikfimi í gangi. Félagasamtök, en samt að þiggja ríkisstyrk sem stjórnmálaflokkur úr ríkissjóði? Er þetta ekki skjalafals og á það að líðast þegar fólk er komið á þing, og hvað þá í ríkisstjórn? Með réttu ætti að rannsaka þetta mál ofan í kjölinn, hvernig hefur verið farið með almannafé þarna, og mér finnst það vera krafa kjósenda að vita það þegar það er búið að úthluta 240 milljónum til stjórnmálaflokks sem er ekki einu sinni stjórnmálaflokkur í fyrirtækjaskrá.

Það tromp að ætla grenja framan í sjónvarpsvélarnar til að búa sér til pólitískt framhaldslíf og halda áfram að reka þetta eignarhaldsfélag fyrir sig og sína held ég að muni ekki selja næst en maður skal ekki útiloka þann möguleika því síðasta fíflið er ekki fætt hér á landi.

Ég man ekki betur en að Inga hafi sagt það sjálf í kosningabaráttunni að það ætti ekki einu sinni að hringja í hana nema bætur yrðu skatta- og skerðingarlausar upp að 450.000 krónum, og hún myndi ekki kvika frá því. Blekið er varla orðið þurrt þegar eignarhaldsfélag „félagasamtök“ Ingu Sæland er búið að selja sál sína, stefnur og hugsjónir bara til þess eins að komast að kötlunum, ef þetta er ekki popúlismi í pólitík þá er hann ekki til. Eða hvað skyldi nú okkar helsti sérfræðingur í popúlisma segja um það, Eiríkur Bergmann prófessor í stjórnmálafræði?

Soffía frænka í Kardemommubænum

Stefnan um Evrópusambandið fór út um gluggann þegar Þorgerður Katrín Gunnarsdóttir brosti til hennar sem hún sagði að væri ekki á dagskrá og væri andstæðingur þess, og það sama var sagt með Borgarlínuna, öll prinsip fokin út í veður og vind og þessi flokkur stendur ekki fyrir neitt nema innistæðulaus loforð.

Það hefur heldur betur heyrst í henni í pontu niðri á þingi þar sem hún hefur sett á svið hvern leikþáttinn á fætur öðrum sem sumir hefðu getað passað Kardemommubænum velþegar Soffía frænka fer upp á há-a c-ið á milli þess sem hún hefur verið með dramaleikþættina með grátstafina í hálsinum yfir fátækt á Íslandi og sérlagi barna. Það var á milli falsgeyplubrosanna og söngatriðanna til sýna hvað hún væri nú alþýðuleg. Ég hef aldrei keypt þessa leikþætti hennar og hef alla tíð þótt þeir klénir og lélegir. Hún hefur aldrei verið neitt annað en lélegur leikari í mínum huga og jafn lélegur stjórnmálamaður.

Hvernig er hægt að taka mark á svona stjórnmálamanni sem varla er búinn að snúa bakinu í kjósendur? Þá er hún búin að svíkja allt sem hún segist standa fyrir svo er hún ekki einu sinni í skráðum stjórnmálaflokki. Er það löglegt? Hvað þá að bjóða sig fram og komast í ríkisstjórn? Hvaða rugl er þetta eiginlega!

Það loforð um að bætur skyldu vera skatta og skerðingar lausar upp að 450.000 kr. var fokið út í veður og vind strax þegar fyrsta símtalið kom frá Kristrúnu, þegar henni og hennar hirð var boðið að koma til stjórnarmyndunarviðræðna þá var gefinn afsláttur af öllu og hún afhjúpaði það sem þetta eignarhaldsfélag er, með ekkert innihald, allt þetta orðagjálfur niður á þingi í gegnum árin var ekkert annað en froða, svo ég taki það orð frá henni sem hana var svo tamt um að nota sjálf.

Ragnar Reykás

Þessi nýi samgöngu- og sveitarstjórnarráðherra hlýtur að vera Ragnar Reykás í dulargervi, sem var einu sinni helsti andstæðingur Borgarlínunnar; eitt af hans fyrstu embættisverkum var að mæta í Nautholtsvík með gulan hjálm og í neongulu vesti að taka fyrstu skóflustunguna fyrir brú sem er fyrsti áfangi í gerð Borgarlínunnar. Það er sá hinn sami sem fór fyrir hóp sem er á móti bókun 35 sem ætlar að sitja hjá eða samþykkja þau lög á komandi þingi bara til þess eins að geta fengið að sitja áfram í ráðherrastóli. Eins hjákátlegt og það hljómar þá reyndi hann að verja það í Silfrinu í gær að hann væri skráður á eyðibýli í Arnarfirði með lögheimili sitt og væri að þiggja greiðslur að upphæð 185.000 kr. á mánuði til að geta keyrt um í kjördæmi sínu til að hitta kjósendur sína. Hver tekur mark á svona manni?

Svo fólk átti sig á upphæðinni og þetta sé sett í samhengi þá er hann að fá 8.880.000 á kjörtímabilinu í búsetustyrk sem hann ætlar að nota til aksturs. Ekki veit ég hvernig hann ætlar að fara að þessu og hafa tíma til þess að keyra svona mikið á kostnað okkar skattgreiðanda. Hvernig er hægt að taka mark á svona manni, hvað þá þegar hann situr í umboði okkar í ráðherrastól?

Tvöföldum launum

Síðan er það borgarfulltrúinn Kolbrún Baldursdóttir sem komst inn á þing sem þiggur laun hjá okkur skattgreiðendum á tveimur stöðum og skammast sín ekki í mínútu fyrir það. Konan sem ætlar að berjast fyrir fátæklingana og ekki síst börn þeirra og hefur verið hvað mest hávær um spillingu í þeirri tíð sem hún sat í borgarstjórn, þá kemur bara í ljós að það er sama rassgatið undir henni eins og hinum sem hún er að gagnrýna, þarna ríður siðblindan ekki einteymingi.

Það er ekki mikill trúverðugleiki hér á ferð í þessu en Ingu Sælands hefur tekist blinda landsmenn og sér í lagi þá sem hafa það sem verst í þessu samfélagi, segjast vera málsvari fátæka fólksins og hennar hirð sem er engin innistæða fyrir. Þetta fólk er bara að hugsa um sig og sína.

Svör Eyjólfs Ármannssonar „Ragnar Reykás“ endurspeglaði svo vel í gær í þættinum Silfrinu á RÚV um hvað þetta fjallar. Mér sýnist verkum þeirra bara á þessum örfáu vikum sem þau hafa verið við völd ekki boða gott og mig hryllir við tilhugsunina að þetta fólk sé komið í ríkisstjórn Íslands; Mig grunar að það muni aldrei skapast friður í kringum þetta fólk og ég ætla að setjast við sjónvarpið með popp og coke þegar alþingi Íslendinga verður sett og fylgjast með leikriti fáránleikans og segja upp enska boltanum til að hafa tíma til að fylgjast með þessu.

Höfundur er áhugamaður um betra samfélag og Miðflokksmaður.