Sjá fót­gang­endur með endur­skin fimm sinnum fyrr

„Þetta er þarft samfélagsverkefni á þessum stystu dögum ársins og við erum þakklátt 66°Norður að vinna að þessu með okkur. Það er mikilvægt að bera endurskinsmerki á þessum tíma en ökumenn sjá fótgangendur með endurskin um fimm sinnum fyrr en ella og á ökumaður því mun meiri möguleika á að forðast slys. Við vonum að átakið hvetji sem flesta til að tileinka sér notkun þeirra,“ segir Gunnar Geir Gunnarsson hjá Samgöngustofu í tilkynningu.

Í tilefni af átakinu eru strætóskýli borgarinnar og samfélagsmiðlar prýdd svartklæddum módelum sem sjást aðeins þegar staðið er nálægt þeim eða þegar birtuskilyrði eru sem best. Þessu má líkja við það sem gerist þegar gangandi vegfarendur eru án endurskins í myrkrinu.

Fram kemur í tilkynningu að með átakinu fylgi myndband sem ber nafnið Sjáumst//ekki og vekur athygli á nauðsyn endurskinsmerkja. Hægt er að kynna sér átakið betur hér.