Sádar sagðir hafa sent fjórar við­varanir

Árásarmaðurinn heitir Taleb al-Abdulmohsen og er fimmtugur maður frá Sádi-Arabíu sem starfað hefur sem geðlæknir í Þýskalandi, eftir að hann flutti þangað árið 2006. Yfirvöld í Sádi-Arabíu eru sögð hafa sent fjórar viðvarnir vegna mannsins til Þýskalands, þar sem hann stóð frammi fyrir mögulegum dauðadómi fyrir að hafna Íslam.

Al-Abdulmohsen ók BMW bíl á miklum hraða um jólamarkað í Magdeburg en er sagður hafa komist inn á svæðið gegnum hlið fyrir viðbragðsaðila. Hann ók um í um þrjár mínútur áður en hann var stöðvaður og handtekinn.

Konurnar sem dóu í árásinni voru samkvæmt lögreglunni 45, 52, 67 og 75 ára gamlar.

Í frétt BBC segir að þó al-Abdulmohsen hafi komið til Þýskalands frá Sádi-Arabíu árið 2006 hafi hann árið 2016 fengið stöðu flóttamanns þar í landi. Þá hélt hann úti vefsíðu þar sem hann aðstoðaði aðra sem flúðu frá Mið-Austurlöndum.

Innflytjendastofa Þýskalands (Bamf) sagði í morgun að stofnunni hefði síðasta sumar borist viðvörun vegna al- Abdulmohsen. Samkvæmt frétt Spiegel gátu starfsmenn stofnunarinnar þó lítið annað gert en vísað þeim sem sendi viðvörunina á lögreglu.

Rannsakendur hafa engin tengsl fundið milli mannsins og íslamskra öfgahreyfinga. Þess í stað benda færslur hans á samfélagsmiðlum til þess að honum hafi verið verulega í nöp við Íslam og kvartaði hann meðal annars yfir því að Þýskaland væri að íslamvæða Evrópu, auk þess sem hann sendi frá sér orðræðu sem tengist öfgahægri öflum á Vesturlöndum.

Þar að auki hafði hann sagst styðja hægri flokkinn umdeilda AfD.

Sjá einnig: Fimmtugur geðlæknir ók bílnum

Hann hafði áður, í viðtali frá 2019, lýst sér sem vinstri sinnuðum og „mesta gagnrýnanda Íslam“ í sögu trúarinnar, samkvæmt frétt Wall Street Journal. Sama ár sagði hann í samtali við Jerusalem Post að hann verði um tíu til sextán tímum á dag í að aðstoða fólk sem hafnaði Íslam að verða sér út um hæli á Vesturlöndum.

Peter R. Neumann, sérfræðingur í hryðjuverkastarfsemi sem starfar meðal annars hjá King‘s College í Lundúnum, sagði í gær að eftir 25 ár í þessum bransa hefði hann haldið að ekkert gæti komið honum á óvart.

Fimmtíu ára gamall Sádi sem hefði „hafnað Íslam og byggi í Austur-Þýskalandi, elskaði AfD og langaði að refsa Þýskalandi fyrir jákvætt viðhorf í garð íslamista“ hefði þó ekki verið eitthvað sem hann ætti von á því að sjá.

Óttuðust áróðursherferð Sáda

BBC hefur eftir heimildarmanni sínum innan stjórnvalda í Sádi-Arabíu að fjórar viðvaranir vegna al-Abdulmohsen hafi verið sendar til Þýskalands, vegna öfgafullra skoðana hans. Þær viðvaranir hafi verið hunsaðar.

Annar heimildarmaður miðilsins sagði þó að mögulega eigi yfirvöld í konungsríkinu í áróðursherferð gegn al-Abdulmohsen þar sem hann hafi reynt að aðstoða konur við að flýja frá Sádi-Arabíu til Þýskalands.

Þá hefur komið fram að al-Abdulmohsen hafnaði Íslam, sem er glæpur í Sádi-Arabíu og stóð hann mögulega frammi fyrir dauðarefsingu þar.

Wall Street Journal segir viðvaranir Sáda hafa snúist um að maðurinn væri hættulegur og að hann ógnaði mögulega öryggi erindreka frá konungsríkinu. Þá segir miðillinn Þjóðverja hafa talið að Sádar væru að segja ósatt til að koma óorði á aðgerðasinna.