Hér og nú fjölgar starfs­mönnum

Í fréttatilkynningu þess efnis segir að Tryggvi mun gegna stöðu texta- og hugmyndasmiðs. Hann eigi að baki farsælan feril sem blaðamaður, leikskáld og leikstjóri á Íslandi og í Noregi. Samfara skapandi skrifum hafi hann verið meðlimur í hönnunarteyminu Reykjavík design lab, sem meðal annars hafi unnið til fjölda FÍT verðlauna og hlotið viðurkenningu ADC*E.

Rakel Mist, birtingaráðgjafi, hafi áður verið fyrirtækjaráðgjafi hjá Símanum og síðar birtingastjóri Sjónvarps Símans. Hún sé með gráðu í viðskiptafræði frá Háskólanum á Akureyri.

Kristján Valur taki við stöðu fjármálastjóra. Hann sé viðskiptafræðingur með meistaragráðu í fjármálum frá EADA viðskiptaháskólanum í Barselóna. Hann hafi starfað við uppgjör og rekstrarráðgjöf frá árinu 2011 fyrir fyrirtæki af öllum stærðum ásamt því að hafa tekið að sér stjórnunarstöður í stærri félögum. Þá hafi hann starfað í fyrirtækjaráðgjöf PwC þar sem helstu verkefni hafi verið áreiðanleikakannanir tengdar kaupum og sölum fyrirtækja ásamt greiningum og verðmötum. Síðustu ár hafi hann verið í eigin ráðgjafastarfsemi ásamt því að hafa rekið eigið fyrirtæki í ferðaþjónustu ásamt eiginkonu sinni til fjölda ára, Steinunni Reynisdóttur.

„Það er frábært að fá allt þetta nýja topp fólk til okkar sem styrkja mun stofuna enn frekar, birtingadeildin okkar fer stækkandi og með nýju starfsfólki þar hafa opnast ný tækifæri. Við leggjum áherslu á að veita fjölbreytta, persónulega þjónustu með áherslu á árangur. Þessar ráðningar koma sannarlega til með að auka enn á breiddina og reynsluna hjá okkur,“ er haft eftir Högni Val Högnasyni, framkvæmdastjóra hönnunar- og hugmynda á Hér og nú.