Stefnt á að koma upp 98 hleðslustöðvum í Kópa­vogi

Frá þessu er greint í tilkynningu en ON og Kópavogsbær undirrituðu samning um uppsetningu og rekstur hleðslustöðva fyrir rafbíla í Kópavogi í kjölfar útboðs.

Í tilkynningu segir að með þessu vilji bærinn gera íbúum kleift að skipta „áhyggjulaust“ yfir í rafbíl. Þá kemur fram að á næstu vikum verði sett upp alls 98 tengi á 14 stöðum í Kópavogi. Það sé við skóla, sundlaugar og bókasöfn. Tengin eigi að nýtast Kópavogsbúum og öðrum rafbílanotendum á meðan þau skreppi á þessa staði.

„Þetta er mjög ánægjulegur áfangi hjá Kópavogsbæ enda er gott aðgengi að hleðslustöðvum ein af forsendum rafbílavæðingar. Við höfum fundið fyrir aukinni eftirspurn eftir hleðslustöðvum, í takt við fjölgun rafbíla og ánægjulegt að geta brugðist við því og auðveldað Kópavogsbúum og öðrum skiptin yfir í rafbíla,“ segir Ásdís Kristjánsdóttir bæjarstjóri, í tilkynningu.

Hægt að hlaða í október

Nú þegar eru samkvæmt tilkynningu komin upp tengi við Fífuna, Fagralund, sundlaug Kópavogs og Hálsatorg. ON gerir ráð fyrir að hægt verið að hlaða rafhlöðurnar á öllum nýju staðsetningunum í Kópavogi í október og með þeirri fjölgun eru Hverfahleðslutengi ON á landinu öllu orðin um 650.

„Það er ánægjulegt fyrir okkur hjá Orku náttúrunnar að vera í þessu samstarfi við Kópavogsbæ enda Hverfahleðslur ON mikilvægur hlekkur í öflugu hleðsluneti okkar um land allt. Markmið ON er að tryggja öruggt aðgengi að rafmagni hvort sem er heima eða á ferðinni, sem og öruggt aðgengi fyrir öll að hleðslustöðvum okkar. Með samstarfinu höldum við áfram vegferð okkar í uppbyggingu innviða fyrir rafbíla þar sem við höfum stolt verið í fararbroddi síðustu 10 ár,“ segir Árni Hrannar Haraldsson, framkvæmdastjóri Orku náttúrunnar, í tilkynningu.