Lands­liðs­maður snýr heim úr at­vinnu­mennsku og semur við Stjörnuna

Orri er uppalinn í Garðabænum og spilaði upp yngri flokkana í Stjörnunni. Hann kemur heim úr atvinnumennsku frá Swans Gmunden í Austurríki. Hann fluttist til félagsins í fyrra og varð meistari með liðinu strax í fyrsta leik. 

Swans Gmunden tókst hins vegar ekki að verja úrvalsdeildartitilinn og féll út í 8-liða úrslitum eftir tap gegn Oberwart Gunners. 

Stjarnan tilkynnti svo félagaskipti Orra á samfélagsmiðlum rétt í þessu. 

„Eftir að Stjarnan hafði samband gengu hlutirnir hratt fyrir sig og er ég mjög ánægður að vera kominn aftur heim. Ég þekki vel til í Garðabænum og hlakka til að komast aftur á parketið í Ásgarði“ sagði Orri Gunnarsson við undirritun samningsins. 

Stjarnan endaði í 9. sæti deildarinnar á nýafstöðnu tímabili og missti af sæti í úrslitakeppninni. 

Liðið hefur styrkt sig mikið það sem af er undirbúningstímabilsins. 

Bjarni Guðmann Jónsson gekk til liðs við Stjörnuna á dögunum en hann kemur úr háskólaboltanum í Bandaríkjunum. Þá skrifaði Kristján Fannar Ingólfsson undir framlengingu í gær, líkt og Júlíus Orri Ágústsson sem gekk frá framlengingu í síðasta mánuði.