Aldrei verið minna af sykri í íslensku Pepsí

Oddur Ævar Gunnarsson skrifar 6. júní 2024 07:01

Sykurmagnið í Pepsí hefur verið minnkað jafnt og þétt. EPA-EFE/MAXIM SHIPENKOV

Íslenskir neytendur hafa fundið fyrir því nýverið að minni sykur er í venjulegu Pepsí en áður. Þess í stað hafa verið sett sætuefni í staðinn, neytendum til mismikillar gleði. Ölgerðin segir ákall hafa verið eftir minna sykurmagni í drykknum.

„Það var í ágúst 2022, eða fyrir rétt tæplega tveimur árum síðan, sem PepsiCo ákvað breytingar á uppskriftinni að Pepsi og Ölgerðin tilkynnti opinberlega um, en hún var gerð í samræmi við stefnu PepsiCo og auknar kröfur neytenda um minna sykurmagn,“ segir í skriflegu svari Ölgerðarinnar til Vísis.

Tilefnið eru ábendingar til fréttastofu frá aðdáendum gosdrykksins heimsfræga um að gervisætindi séu nú til staðar á innihaldslista drykkjarins, sætuefni líkt og asesúlfam og súkralósi. Einn sem hafði samband við fréttastofu sagðist hafa drukkið drykkinn um margra ára skeið en sagðist ekki vilja sjá hann eftir breytingarnar.

Sykurmagnið nú í fimm grömmum

Þá er rætt um breytingarnar í Facebook hópnum Nammitips. Athygli er vakin á því að nú sé gervisykur í Pepsíinu og segist málshefjandi hafa orðið fyrir miklum vonbrigðum þegar hún opnaði sína dós af drykknum.

Í svörum Ölgerðarinnar til Vísis vegna málsins kemur fram að fyrst hafi sykurmagnið í Pepsí verið minnkað í febrúar í fyrra.

„Og var þá m.a. farið niður í 7 grömm af sykri í hverjum 100 ml og síðar var næsta skref tekið og nú eru tæp 5 grömm af sykri í hverjum 100 ml, aðeins 59 kaloríur í hverri dós, en sætuefnin eru svipuð, en ekki alveg eins og í Pepsi Max.“

Neytendur Drykkir