Viðskipti innlent

Base parking gjald­þrota

Kjartan Kjartansson skrifar
Skilaboð um að aðgangi hafi verið lokað taka á móti þeim sem reyna að fara inn á vefsíðu Base Parking.
Skilaboð um að aðgangi hafi verið lokað taka á móti þeim sem reyna að fara inn á vefsíðu Base Parking. Vísir

Bílastæðaþjónustan Base Parking á Keflavíkurflugvelli var úrskurðuð gjaldþrota í Héraðsdómi Reykjaness í síðustu viku. Vefsíðu hennar hefur verið lokað, rúmum tveimur vikum eftir að nafni félagsins var breytt í Siglt í strand ehf. Fyrirtækið hefur ítrekað ratað í fréttir vegna óánægju viðskiptavina með þjónustuna.

Nokkrar breytingar hafa verið skráðar hjá Base Parking á undanförnum vikum. Fyrir utan nafnbreytinguna 29. apríl var Ómar Þröstur Hjaltason, sem hefur verið í forsvari fyrir félagið, skráður úr stjórn þess og lögheimili og póstfang félagsins fært í Ármúla 19 í Reykjavík eftir hluthafafund 1. maí. Engin merki var að finna um félagið í skrifstofuhúsnæðinu í Ármúla þegar blaðamaður leitaði að því á mánudag.

Vefsíða Base Parking hefur verið virk undanfarna daga en nú skilar slóðin tilkynningu frá hýsingarþjónustu síðunnar um að aðgangnum hafi verið lokað.

Hildur Leifsdóttir, skipaður skiptastjóri þrotabúsins, staðfestir að Siglt í strand hafi verið úrskurðað gjaldþrota í síðustu viku.

Guðbjörg Kristmundsdóttir, formaður Verkalýðs- og sjómannafélags Keflavíkur og nágrennis, segir að félagið sé byrjað að gera kröfur fyrir tíu starfsmenn Base Parking til ábyrgðarsjóðs launa. Fyrstu starfsmennirnir hafi byrjað að leita til verkalýðsfélagsins í síðustu viku. Ógjörningur sé að segja hversu margir hafi starfað fyrir fyrirtækið þar sem stéttarfélagsgjöld hafi skilað sér illa eða alls ekki. Sumir starfsmannanna hafi verið skráðir í stéttarfélagið Eflingu.

Ómar Þröstur Hjaltason, fyrrverandi forsvarsmaður Base Parking, á fundi hjá Félagi atvinnurekenda árið 2019.Félag atvinnurekenda

Næst ekki í forsvarsmenn

Ekki hefur náðst í Ómar Þröst þrátt fyrir ítrekaðar tilraunir. Fyrra símanúmeri hans virðist hafa verið lokað og tölvupóstfangi hjá Base Parking sömuleiðis. Ekki hefur heldur náðst í Geir Þorsteinsson sem er skráður forráðamaður félagsins.

Þá hefur ekki verið svarað í símanúmer sem gefið var upp á vefsíðu Base Parking og í símaskrám. Símsvari með skilaboðum um að ekki náist í farsímann mæta þeim sem reyna að hringja í númerið.

Þjónusta Base Parking fólst í að starfsmenn sáu um að leggja bílum flugfarþega og færa þeim þá aftur við heimkomu. Viðskiptavinir fyrirtækisins kvörtuðu undan því lyklar og jafnvel bílar þeirra fyndust ekki þegar þeir ætluðu að fá þá til baka. Í sumum tilfellum lögðu starfsmenn Base Parking bílum í gjaldskyld stæði þannig að viðskiptavinir voru tvírukkaðir fyrir að leggja bílum sínum.

Einn viðskiptavinur sá á upptöku úr framrúðumyndavél bíls síns að starfsmaður fyrirtækisins hefði ekið bílnum á 170 kílómetra hraða á klukkustund. Verkalýðs- og sjómannafélag Keflavíkur og nágrennis hefur haft áhyggjur af því að Base Parking brjóti á réttindum starfsmanna og greiði þeim svart.

Fréttin var uppfærð eftir að skiptastjóri staðfesti gjaldþrotið.

Keflavíkurflugvöllur Bílar Bílastæði Gjaldþrot

Tengdar fréttir

Starfsmaður Base Parking á 170 á bíl viðskiptavinar

Karlmanni sem nýtti sér þjónustu Base Parking á dögunum brá í brún þegar hann kíkti á upptöku úr hraðamyndavél bílsins og sá að honum hefði verið ekið á 170 kílómetra hraða í átt að bílageymslu fyrirtækisins. 

Mál tengd Base Parking á borði Neytendasamtakanna í hverjum mánuði

Formaður Neytendasamtakanna segir ótrúlegt hversu mörg mál tengd fyrirtækinu Base Parking rati á borð samtakanna. Fyrirtæki verði að vanda til verka þegar neytendur treysti þeim fyrir eigum sínum, sem í þessum tilvikum séu oft á tíðum mjög dýrar bifreiðar. 

Ó­fagrar sögur af við­skiptum við Base Parking

Eftir að Vísir birti frétt um starfsemi Base Parking á fimmtudag hafa hvolfst yfir ritstjórnina ófagrar sögur af starfseminni. Þær eru flestar með sama sniði en hver með sínu lagi. Ómar Þröstur Hjaltason eigandi fyrirtækisins segir hins vegar að allt kapp sé lagt á að viðskiptin gangi smurt fyrir sig.

Hafa haft áhyggjur af starfsemi Base Parking í mörg ár

Formaður verkalýðsfélags Keflavíkur og nágrennis segir áhyggjur hafa verið uppi um starfsemi bílastæðaþjónustunnar Base Parking á Keflavíkurflugvelli í fjöldamörg ár. Grunur er um að brotið sé á réttindum starfsmanna og að þeir fái greitt undir borðið. Fjölmargir viðskiptavinir lýsa slæmri reynslu sinni af viðskiptum við fyrirtækið.

„We lost your keys“

Ófögrum sögum fer af fyrirtækinu Base Parking sem sér um að leggja bílum og geyma fyrir flugfarþega. James Weston er forstöðumaður á frístundaheimili og hann fékk að finna fyrir óvönduðum vinnubrögðum.



Mest lesið


Fleiri fréttir

Sjá meira


×

Mest lesið