Faðir mannsins sem lést á Litla-Hrauni krefst um­bóta

Lögreglan á Suðurlandi rannsakar nú andlát þrjátíu og tveggja ára karlmanns sem fannst látinn í fangaklefa á Litla Hrauni í gærmorgun. Ekki er uppi grunur um saknæmt athæfi. Tómas berst fyrir umbótum á kerfinu sem sonur hans var fastur í.

„Ég hef bara ekkert sofið og maður er í lausu lofti. Bróðir hans deyr fyrir sjö árum á sama degi.“

Á sama degi?

„Já, og þess vegna vil ég fara með þetta í blöðin og eins langt og hægt er.“

Hvað kom fyrir bróður hans?

„Hann fannst látinn inni á hótelherbergi á Alicante á Spáni. Hann var búinn að vera inni og úti á Litla-Hrauni og Sogni og allt saman líka og enginn hjálp fyrir hann og engin hjálp fyrir þennan númer tvö.“

Það sé stór pakki að missa tvo syni.

„Ég ætla að reyna að koma til Íslands, ég ætla að halda áfram í blöðum, halda áfram að vinna að umbótum fyrir fanga á Litla-Hrauni; að fólk sé ekki að deyja í hrönnum inni á Litla-Hrauni. Þarna liggur hjartað mitt, í minningu hans.“

Tómas er gagnrýninn á fangelsismálayfirvöld. Þegar menn séu frelsissviptir séu þeir á ábyrgð fangelsismálayfirvalda og segir greinilegt að menn hafi ekki haft nægt eftirlit í ljósi þess hvernig fór.

Þungbært að fara aftur inn á Litla-Hraun

Hinn látni hafði bæði afplánað í lokuðu og opnu fangelsi og var kominn inn á áfangaheimilið Vernd en var gert að fara aftur inn á Litla-Hraun eftir meint brot og lést skömmu síðar. Guðmundur Ingi Þóroddsson, formaður Afstöðu segir þetta afar þungbæran tímapunkt fyrir fanga og að hlúa hefði þurft að andlegu hliðinni.

„Það er áfall að fara í fangelsi og það er enn meira áfall þegar þú ert kominn í einhvers konar framför í kerfinu að þér sé kippt til baka, það er mjög erfitt.“

Hann er gagnrýninn á stjórnvöld og kallar eftir endurhæfingarstefnu.

„Það segir sig sjálft, þegar við erum ekki með stefnu í fangelsismálum, að svona hlutir gerast. Ég verð að segja að ég er orðinn afar þreyttur á að koma í viðtal eftir viðtal og vekja athygli á þessu, að við þurfum stefnu í málaflokknum, við þurfum að taka upp endurhæfingarstefnu og vinna með fólki sem er þarna inni. Þetta er oft og tíðum veikt fólk og fólk sem þarf mikla aðstoð og andlega aðstoð, eins og í þessu tilfelli.“

Þetta hafi hann margsinnis bent á.

„Menn eru í þessari hringiðu glæpa, fangelsa, heimilisleysis og þetta endar alltaf með ósköpum og fyrir samfélagið allt; við getum tekið á þessu, við getum komið í veg fyrir atvik eins og þessi og við getum komið í veg fyrir glæpi en við erum bara ekki að gera það, þetta er í boði yfirvalda.“

Tómasi finnst mikilvægt að fólk átti sig á að sonur hans hafi verið meira en vandamálin sem hann glímdi við.

„Hann var bara ljós í lífinu mínu og hefur alltaf verið.“