Búið að fjar­lægja aug­­lýsingarnar af gólfinu í Smáranum

Remy Martin spilar ekki meira með Keflvíkingum í úrslitakeppni Subway deildar karla í körfubolta eftir að hafa rifið hásin í fyrsta undanúrslitaleiknum á móti Grindavík.

Martin virtist renna á auglýsingu á gólfinu í Smáranum þegar hann meiddist. Martin fór á kostum með bikarmeisturum Keflavíkur í vetur en meiðsli eins og hann glímir nú við geti orðið til þess að ferlinum hans ljúki. Vonandi tekst honum að koma til baka.

Hér fyrir neðan má sjá atvikið þegar Martin meiðist.

Stjórn ÍTK, Íslensks toppkörfubolta, sendi frá sér yfirlýsingu í framhaldinu þar sem kallað var eftir því að auglýsingar á gólfum körfuboltavalla verði bannaðar þar sem þær geta valdið alvarlegum slysum.

Auglýsingar eins og þessi eru límdar á gólf flestra íþróttahúsa landsins og hafa verið til staðar í áraraðir. Þær geta hins vegar skapað hættu fyrir leikmenn vegna þess að þær safna upp ryki hraðar en hinn almenni gólfflötur.

Nýjustu fréttir frá Smáranum eru að það er nú búið að fjarlægja allar þessar auglýsingarnar af gólfinu í Smáranum. Nú eru allar auglýsingarnar farnar fyrir utan auglýsinguna í miðjuhringnum.

Næsti leikur í einvígi Grindavíkur og Keflavíkur fer einmitt fram í Smáranum á miðvikudagskvöldið kemur en staðan í einvíginu er 1-1 eftir að Keflvíkingar jöfnuðu metin á heimavelli sínum í gær.