Hagnaður Arion dróst saman um tvo milljarða

Kjarnatekjur Arion drógust saman um tvö prósent á ársfjórðungnum og kostnaður sem hlutfall af kjarnatekjum var 48,4 prósent. Hann var 46,8 prósent á fyrsta ársfjórðungi í fyrra.

Rúmlega þrettán milljarðar króna voru greiddar í arð á fjórðungnum en það samsvarar níu krónum á hlut. Hagnaður á hlut var 3,07 krónur, samanborið við 4,32 í fyrra.

Áhugasamir geta fundið frekar upplýsingar um ársfjórðungsuppgjörið hér.

Í yfirlýsingu frá Arion er haft eftir Benedikt Gíslasyni, bankastjóra, að þessi lægri afkoma skýrist fyrst og fremst af lægri þóknanatekjum og háu skatthlutfalli þar sem tap vegna hlutabréfa sem haldið er gegn framvirkum samningum leiðir til 38 prósenta skatthlutfalls á tímabilinu. Eiginfjár- og lausafjárstaða, auk fjármögnun bankans sé sterk.

„Við vinnum nú að því að ná markmiðum okkar varðandi hlutfall eiginfjárþáttar 1. Í lok tímabilsins var hlutfallið 18,8 prósent sem er 3,5 prósentustigum yfir kröfum eftirlitsaðila en markmið okkar er að vera 1,5-2,5 prósentustigum yfir þeirra kröfum. Í gangi er endurkaupaáætlun sem er liður í því að færa hlutfallið nær markmiði okkar,“ er haft eftir Benedikt.

Benedikt vísar einnig til þess að hægt hafi á umsvifum í efnahagslífinu vegna hárra stýrivaxta. Það hafi meðal annars valdið lægri þóknunartekjum.