Tölum um neyt­enda­mál!

„Við viljum sjá hvaða mál brenna helst á neytendum, kynna samtökin og þann ávinning sem sterkur hagur neytenda færir fólki, fyrirtækjum og samfélaginu öllu,“ segir Breki Karlsson, formaður Neytendasamtakanna, og bætir við að umræðuefnin séu fjölmörg: „Heildarstefnumótun í neytendamálum, samkeppni, flutningskostnaður, raforkuöryggi og -verð, dýrtíðin og svo mætti lengi telja. Ég hvet neytendur um allt land til að mæta og láta í sér heyra.“

Fundadagskráin er sem hér segir:

2. maí á Ísafirði

6. maí á Sauðárkróki

6. maí á Akureyri

7. maí á Húsavík

7. maí á Egilsstöðum

8. maí á Höfn Hornafirði 

13. maí í Vestmannaeyjum

Nánari upplýsingar má finna hér en fleiri staðir gætu bæst við.

Samtök sem aðstoða, fræða og breyta samfélagi

Aðspurður segir Breki hlutverk Neytendasamtakanna vera að standa vörð um og efla hag og réttindi neytenda. „Segja má að neysla hafi sjaldan verið auðveldari en einmitt nú, en samt hefur aldrei verið flóknara að vera neytandi,“ segir Breki. Frá stofnun Neytendasamtakanna, fyrir meira en 70 árum, hefur réttaraðstoð við félagsmenn verið veigamikill þáttur í starfsemi samtakanna, allt frá því að veita neytendum upplýsingar um réttindi sín í síma, til þess að láta reyna á lögmæti lánasamninga fyrir EFTA-dómstólnum.

Samtökin frá upphafi gefið út Neytendablaðið, sem Breki segir stútfullt að fræðandi og skemmtilegu efni um alls kyns neytendamál og sent öllum félögum samtakanna. Í nýútkomnu blaði er fjallað um jafn ólíkt efni og skaðleg litarefni, upprunamerkingu, nikótínpúða, bankakostnað og margt fleira. 

Með hagsmunabaráttu sinni eru Neytendasamtökin líka samfélagslegt umbreytingaafl. Samtökin koma sjónarmiðum neytenda á framfæri við fyrirtæki og stjórnvöld, veita aðhald og stuðla að heilbrigðari viðskiptaháttum. Breki segir að mörgu að gæta í neyslusamfélaginu í dag og sem betur fer úr svo ótal mörgu að velja, hvort sem það snýr að matvælum, tryggingum, fjármálum, símaþjónustu eða raforkukaupum, svo fátt eitt sé nefnt. 

„Þá er gott að vita til þess, ef svo bagalega vill til að varan eða þjónustan er gölluð, að Neytendasamtökin eru til staðar til að leiðbeina, aðstoða, standa vörð og sækja fram. Sterkir, öruggir og fróðir neytendur eru forsenda fyrir heilbrigðu hagkerfi, öflugu atvinnulífi og sjálfbærri þróun í umhverfislegu, félagslegu og efnahagslegu tilliti,“ segir Breki.

Neytendur eru sterkari saman

Neytendasamtökin eru frjáls félagasamtök sem reiða sig á árgjöld félaga sinna: „Það er mikið hagsmunamál alls almennings að Neytendasamtökin séu sterk og til þess þurfa sem flestir landsmenn að ganga til liðs við samtökin. Neytendasamtökin veita fyrirtækjum og valdhöfum raunverulegt aðhald, og almenningi vörn gegn ásælni sérhagsmunahópa í réttindi neytenda. Við erum sterkari saman. Þú getur lagt þitt lóð á vogarskálarnar með því að gerast félagi og greiða árgjaldið, 7.900 kr.,“ segir Breki að lokum.